My Travelogue ( എന്റെ യാത്രകള്‍‌ )

മുളങ്കുഴി | Mulamkuzhi

2011-06-19T03:01:00.001+05:30

ഇത്തവണയും പതിവ് തെറ്റിക്കുന്നില്ല, എന്നത്തേയും പോലെ യാതൊരുവിധ മുന്നൊരുക്കങ്ങളും ഇല്ലാത്ത യാത്ര. എന്റെ യാത്രകൾ പലപ്പോഴും അങ്ങനെയാണ്. അപ്രതീക്ഷിതമായിട്ടാവും ഓരോ സ്ഥലങ്ങളിൽ എത്തിപ്പെടുക. പലപ്പോഴും ജോലിയുടെ ഭാഗമായി പലസ്ഥലങ്ങളിലും പോകേണ്ടിവരാറുണ്ട്. ജോലി നേരത്തെ കഴിഞ്ഞാൽ അവിടെ അടുത്ത് പ്രസിദ്ധമായ ഏതെങ്കിലും സ്ഥലം ഉണ്ടെങ്കിൽ സന്ദർശിക്കും. ചിത്രങ്ങൾ എടുക്കും. സമയം കിട്ടിയാൽ ആ ചിത്രങ്ങളും വിശേഷങ്ങളും ബൂലോകത്തിലൂടെ പങ്കുവെയ്ക്കും.

ഇന്നത്തെ യാത്രയും അങ്ങനെ തന്നെ. ധാരാളം ചലച്ചിത്രങ്ങളിലൂടെ കണ്ട് പരിചയപ്പെട്ട ഒരു സ്ഥലത്തേയ്ക്ക്. എറണാകുളം ജില്ലയിൽ അന്താരാഷ്ട്ര തീർത്ഥാടനകേന്ദ്രമായ മലയാറ്റൂരിൽ നിന്നും ഏകദേശം പതിനഞ്ചു കിലോമീറ്റർ അകലെ മുളംകുഴി എന്ന കൊച്ചു ഗ്രാമത്തിലേയ്ക്ക്. ഈ സ്ഥലനാമം പല രീതിയിൽ എഴുതിക്കണ്ടു, മുളംങ്കുഴി, മുളങ്കുഴി, മുളംകുഴി അങ്ങനെയെല്ലാം. എന്തായാലും ഉഛാരണത്തിൽ ഒന്നു തന്നെ മുളങ്കുഴി. രണ്ടു നദികളുടെ സംഗമസ്ഥാനമാണ് മുളങ്കുഴി, പെരിയാറും പെരുന്തോടും ഇവിടെ സംഗമിക്കുന്നു. മുളങ്കുഴി പുഴ എന്ന് ഇവിടെ പെരിയാറിനെ ചിലർ പറയുമ്പോൾ തദ്ദേശവാസികൾ ഇവിടെ വിശേഷിപ്പിക്കുന്നത് മഹാഗണിത്തോട് എന്നാണ്. ഇവിടുത്തെ വനത്തിലെ വൃക്ഷങ്ങളിൽ അധികവും മഹാഗണി ആയതുകൊണ്ടാണ് ഈ പേരിൽ ഇവിടം അറിയപ്പെടുന്നത്.

ഇവിടെ എത്തിപ്പെടുക എന്നത് വളരെ എളുപ്പമാണ്. അങ്കമാലിയിൽ നിന്നും കാലടിയിൽ നിന്നും നല്ലരീതിയിൽ തന്നെ സ്വകാര്യബസ് സർവ്വീസ് ലഭ്യമാണ്. സ്വന്തം വാഹനം ഉള്ളവർക്കും എം സി റോഡിൽ കാലടിയിൽ നിന്നും മലയാറ്റൂർ, കാടപ്പാറ, ഇല്ലിത്തോട് വഴി മുളങ്കുഴിയിൽ എത്തിച്ചേരാവുന്നതാണ്. ഒരു വിനോദയാത്രയ്ക്കൊപ്പം ചില തീർത്ഥാടന കേന്ദ്രങ്ങൾ സന്ദർശിക്കാം എന്ന ലാഭവും ഈ യാത്രയിൽ ഉണ്ട്. ജഗദ് ഗുരു ആദി ശങ്കരന്റെ ജന്മം കൊണ്ട് പാവനമായ കാലടിയും അവിടത്തെ ശൃഗേരി മഠവും, ശങ്കരസ്തൂപവും എല്ലാം ധാരാളം തീർത്ഥാടകരും വിനോദസഞ്ചാരികളും വന്നെത്തുന്ന സ്ഥലമാണ്. അവിടെ നിന്നും മലയാറ്റൂരിൽ എത്തുമ്പോൾ യേശുദേവന്റെ പന്ത്രണ്ടു ശിഷ്യന്മാരിൽ ഒരാളായ വിശുദ്ധ തോമസ്സിന്റെ പാദസ്പർശം കൊണ്ട് പവിത്രമായ മലയാറ്റൂരിൽ എത്താം. ഇന്ന് മലയാറ്റൂർ ലോകശ്രദ്ധയാകർഷിച്ച ഒരു തീർത്ഥാടന കേന്ദ്രമാണ്. വിശുദ്ധ തോമസ്സിന്റെ പേരിലുള്ള 690 മീറ്ററോളം ഉയരമുള്ള മലയാറ്റൂർ മലകയറ്റം ഈസ്റ്റർ നാളികളിൽ പാവനമായി കരുതപ്പെടുന്നു.

മലയാറ്റൂരിൽ നിന്നും പതിനഞ്ചു കിലോമീറ്റർ കൂടി യാത്രചെയ്താൻ മുളങ്കുഴിയിൽ എത്താം. പൊതുജനത്തിന് വാഹനത്തിൽ സഞ്ചരിക്കുന്നതിനുള്ള പാത മുളങ്കുഴിയിൽ അവസാനിക്കുന്നു. പിന്നീടങ്ങോട്ടുള്ള പാത പൂർണ്ണമായും വനം വകുപ്പിന്റെ കീഴിലാണ്. മുൻ‌കൂട്ടി പ്രവേശനാനുമതി വാങ്ങിയവർക്കു മാത്രമേ തുടർന്നുള്ള വഴിയിലൂടെ യാത്രചെയ്യാൻ സാധിക്കൂ. ഇവിടെ നിന്നും വനാന്തർഭാഗത്തുള്ള പാതയിലൂടെ ഭൂതത്താൻ‌കെട്ടിലും കോതമംഗലത്തും എത്തിച്ചേരാൻ സാധിക്കും. മുളങ്കുഴിയിൽ ഉള്ള വനം‌വകുപ്പിന്റെ കൗണ്ടറിൽ നിന്നും സന്ദർശനപാസ്സ് വാങ്ങിയതിനു ശേഷം വേണം മുളങ്കുഴി പുഴയിലേയ്ക്കും അതിനു സമീപമുള്ള വനത്തിലേയ്ക്കും കടക്കാൻ. ഗൈഡുകളും വനവും പരിസ്ഥിതിയും വൃത്തിയായി സൂക്ഷിക്കുന്നതിനുള്ള ജീവനക്കാരും എല്ലാം അവിടെ ഉണ്ട്. ഒരാൾക്ക് നിലവിൽ പത്തു രൂപയാണ് സന്ദർശനത്തിനുള്ള ടിക്കറ്റിന്റെ വില. ഇതിനോട് ചേർന്നു തന്നെ വാഹനങ്ങൾ പാർക്ക് ചെയ്യുന്നതിനുള്ള സൗകര്യവും ഉണ്ട്.

ടിക്കറ്റെടുത്ത് കാട്ടിലൂടെയുള്ള നടപ്പാതയിലേയ്ക്ക് പ്രവേശിക്കുമ്പോൾ ആദ്യം നമ്മളെ സ്വാഗതം ചെയ്യുന്നത് ഈ മുന്നറിയിപ്പാണ്. എറണാകുളം ജില്ലയിലെ പല ഭാഗങ്ങൾക്കും ആവശ്യമുള്ള കുടിവെള്ളം പെരിയാറിൽ നിന്നുമാണ് ലഭ്യമാവുന്നത്. ഈ വെള്ളത്തിന്റെ അളവ് നിയന്ത്രിക്കുന്നത് ഭൂതത്താൻ‌കെട്ട് ഡാമിലൂടെയാണ്. മഴക്കാലത്ത് ഡാമിലെ ജലനിരപ്പ് ഉയരുമ്പോളും വേനൽക്കാലത്ത് ഓരു വെള്ളം കയറുന്നതു വഴി പെരിയാറിലെ ലവണാംശം കൂടുമ്പോഴും ഭൂതത്താൻ‌കെട്ട് തുറന്നു വിടാറുണ്ട്. ഇതുമൂലം പലപ്പോഴും അപ്രതീക്ഷിതമായി പെരിയാറിലെ മറ്റുസ്ഥലങ്ങളിൽ എന്ന പോലെ മുളങ്കുഴിയിലും ജലനിരപ്പ് ഉയരാം. ഇതുമൂലം പല മനുഷ്യജീവനുകളും ഇവിടെ നഷ്ടപ്പെട്ടിട്ടുണ്ട്. അതാണ് ഇത്തരം ഒരു മുന്നറിയിപ്പിന് പിന്നിൽ.

പിന്നീട് അങ്ങോട്ട് പ്രകൃതിദത്തമായ വനമാണ്. മഴക്കാലമായതിനാൽ എങ്ങും പച്ചപ്പ് മാത്രം. പലതരം പക്ഷികളുടെ ശബ്ദവും കേൾക്കാം. പക്ഷികളെ നോക്കി നടന്നാൽ വീണതു തന്നെ, കാരണം മഴവെള്ളവും ചെളിയും ഇലകളും എല്ലാം ചേർന്ന് നല്ല വഴുക്കുണ്ട് ചില സ്ഥലങ്ങളിൽ

എന്നാലും അപരിചിതമായ ഒരു ശബ്ദം കേട്ട് മുകളിലേയ്ക്ക് നോക്കി. നേരെ മുകളിലെ മരക്കൊമ്പിൽ ഒരു പക്ഷി. മുൻപ് ചിത്രങ്ങൾ കണ്ടുള്ള പരിചയത്തിൽ അത് വേഴാമ്പൽ ആവണം

മുകളിലെ ചിത്രത്തിൽ ഉണ്ട് ആൾ. സൂക്ഷിച്ചു നോക്കണം എന്നു മാത്രം. കാനൻ പവർ ഷോട്ട് 410-ൽ ഇത്രയുമേ പുള്ളി പതിയൂ.

വീണ്ടും മുന്നോട്ട്. ഇന്ന് ഒരു പ്രത്യേകതയുണ്ട്. മഴക്കാലമായതിനാൽ ഞാൻ മാത്രമേ അവിടെ ഉള്ളു. മഴക്കാലത്ത് പുഴയിൽ ഇറങ്ങുക അപകടമായതിനാൽ ആരും ആ വഴി വരില്ല. പിന്നെ അവിടെ സമീപത്തു തന്നെയുള്ള ഒരു നേതാവ് മരിച്ചതിനാൽ ഗൈഡുകളും, ഗാർഡുകളും എല്ലാം അവിടെ പോയിരിക്കുന്നു. അതുകൊണ്ടു തന്നെ ടിക്കറ്റ് കൗണ്ടറിൽ ഉള്ളവർക്ക് എന്നെ ഒറ്റയ്ക്ക് പറഞ്ഞയക്കാൻ എന്തോ വിഷമം ഉള്ളതുപോലെ തോന്നി. അപ്പോൾ അവർ പറഞ്ഞില്ലെങ്കിലും ഞാൻ തിരിച്ചെത്തിയപ്പോൾ അവർ അതു പറഞ്ഞു.

ചുറ്റും നല്ല ഉയരത്തിൽ വളർന്നു നിൽക്കുന്ന തേക്കും മഹാഗണിയും. അകലെ പുഴ ഒഴുകുന്ന കളകള ശബ്ദം. പിന്നെ ചീവീടിന്റേയും പക്ഷികളുടേയും ശബ്ദം. മഴക്കാറുള്ളതിനാൽ വെളിച്ചവും കുറവ്. അധികം ധൈര്യശാലി അല്ലാത്തതിനാൽ ഇടയ്ക്ക് തിരിച്ചു പോയാലോ എന്ന് ചിന്തിച്ചു. വഴിതെറ്റിയാൽ എന്തു ചെയ്യും. ഇതൊക്കെയായി മനസ്സിൽ കടന്നുകൂടിയ ചിന്തകൾ. പിന്നെ രണ്ടും കല്പിച്ച് മുൻപോട്ട് തന്നെ നടന്നു.

അങ്ങനെ ഒടുവിൽ ലക്ഷ്യസ്ഥാനത്തെത്തി. ഈ കാണുന്ന അപകട സൂചകത്തിനും അപ്പുറമാണ് മുളങ്കുഴി പുഴയെന്നും മഹാഗണിത്തൊടെന്നും പറയപ്പെടുന്നു പെരിയാർ. ആ മരത്തിനു പിന്നിലൂടെ പുഴയിൽ ഇറങ്ങുന്നതിനുള്ള കല്‍പ്പടവുകൾ ഉണ്ട്. അതിലൂടെ മുന്നോട്ട്.

അവിടെ പരന്നൊഴുകുന്ന പെരിയാർ. പുറമെ ശാന്തമെന്ന് തോന്നുമെങ്കിലും നല്ല ഒഴുക്കുണ്ട്. ഈ ഒഴുക്കിനടിയിൽ കാണാൻ സാധിക്കാത്ത കുഴികളും കയങ്ങളും. പറക്കെട്ടുകളിലെ കുഴികൾ പണ്ട് അതിരപ്പിള്ളി യാത്രയിൽ അനുഭവിച്ചതാണ്. ഒറ്റക്കായതിനാൽ എന്തായാലും പുഴയിൽ ഇറങ്ങാനൊന്നും തുനിഞ്ഞില്ല, ഇതിന്റെ മറുകരയിൽ കോടനാടും, ഇല്ലിത്തോടും ആണെന്ന് തിരിച്ചുചെന്നപ്പോൾ ടിക്കറ്റ് കൗണ്ടറിൽ നിന്നും മനസ്സിലാക്കി. അല്പസമയം അവിടെ ഇരുന്ന് പുഴയുടെ ഒഴുക്കും ശബ്ദവും എല്ലാം ആസ്വദിച്ച തിരിച്ചു നടന്നു.

ഈ കടവിനോട് ചേർന്ന് സന്ദർശകർക്ക് ഇരിക്കുന്നതിനുള്ള സൗകര്യം ഒരുക്കിയിരുന്നു. ഇപ്പോൾ സന്ദർശകർ വരുന്ന സമയമല്ലാത്തതിനാലും മഴക്കാലമായതിനാലും അവയെല്ലാം നശിച്ചു തുടങ്ങി. അടുത്ത സീസണിൽ ഇവിയെല്ലാം പുനർനിർമ്മിക്കപ്പെടും. മുളങ്കുഴിയിലേയ്ക്ക് വരുന്നവർ ഭക്ഷണവും വെള്ളവുമെല്ലാം കൂടെ കരുതുന്നത് നല്ലതാവും എന്ന് ഞാൻ കരുതുന്നു. നല്ല ഭക്ഷണം കിട്ടുന്ന സ്ഥലങ്ങളൊന്നും അവിടെ കണ്ടില്ല. പ്ലാസ്റ്റിക്, ലഹരി പദാർത്ഥങ്ങൾ എന്നിവയ്ക്ക് അവിടെ വിലക്കുണ്ടെങ്കിലും പല മദ്യക്കുപ്പികളുടേയും അടപ്പ് അവിടെ നിലത്തുണ്ടായിരുന്നു. മദ്യപിച്ചെത്തുന്ന സന്ദർശകരും ഇവിടെ അപകടങ്ങൾക്ക് കാരണമാകുന്നു.

സന്ദർശകർക്കായി ഒരുക്കിയിരിക്കുന്ന മറ്റൊരു വിശ്രമസ്ഥലം. ഇതും ഇപ്പോൾ നശിച്ചിരിക്കുന്നു.

പൊക്കമേറിയ മരങ്ങൾക്കിടയിലൂടെ വീണ്ടും മടക്കയാത്ര തുടർന്നു.

കുറച്ച് ചെന്നപ്പോൾ അല്പം കൂടി ഇടുങ്ങിയ ഒരു വഴി ഒരു വശത്തേയ്ക്ക് പോകുന്നത് കണ്ടു. അതിലൂടെ അല്പം നടന്നപ്പോൾ മറ്റൊരു കടവിൽ എത്തി. ഇവിടെ കല്‍പ്പടവുകൾ ഇല്ല, ഇതല്പം സാഹീസകർക്കായുള്ള സ്ഥലമാവും എന്ന് തോന്നി. കാരണം പ്രധാന പാതയിൽ നിന്നും അല്പം മാറിയാണ് ഈ സ്ഥലം.

ഇവിടെ നിന്നും നോക്കിയപ്പോൾ പല ചിത്രങ്ങളിലേയും രംഗങ്ങൾ മനസ്സിൽ വന്നു. പ്രധാനമായും വന്നത് നരനിലെ ലാലേട്ടന്റെ സാഹസീകരംഗങ്ങൾ. വേനൽക്കാലത്ത് പുഴയിലെ വെള്ളം കുറയുമ്പോൾ ഇവിടെ ഇടയ്ക്കിടെയായി തുരുത്തുകൾ പോലെ കര കാണാൻ സാധിക്കും. അപ്പോൾ പലരും പുഴ നീന്തി ആ കരയിലേയ്ക്ക് പോകും. ഈ സഹസീകതയാണ് പലപ്പോഴും അപകടങ്ങൾ വരുത്തുന്നത്.

മരങ്ങൾക്കിടയിലൂടെ വീണ്ടും പ്രധാനപാതയിലേയ്ക്ക്. ചെളിയിൽ തെന്നി വീഴാ‍തെ വഴിയിൽ മാത്രം ശ്രദ്ധിച്ച് മുന്നോട്ട് നീങ്ങവെ ഒരു പക്ഷിയുടെ ശബ്ദം വളരെ അടുത്തുനിന്നും കേട്ടു. പെട്ടന്ന് തലയുയർത്തിയ ഞാൻ ശരിക്കും ഞെട്ടി.

അടുത്തുള്ള ഒരു മരത്തിൽ ചുറ്റിക്കയറ്റിയ വള്ളിയാണ് ഞെട്ടിച്ചത്. ആദ്യം കണ്ടപ്പോൾ ശരിക്കും പാമ്പാണെന്നാണ് ഞാൻ കരുതിയത്. രജവെമ്പാലയെക്കുറിച്ചുള്ള ഒരു ഡൊക്യുമെന്ററി ഡിസ്കവറി ചാനൽ ചിത്രീകരിച്ചത് മുളങ്കുഴി മുതൽ ഭൂതത്താൻ‌കെട്ടു വരെയുള്ള സ്ഥലത്തു വെച്ചാണ് ഇങ്ങോട്ടുള്ള യാത്രയ്ക്കിടയിൽ ബസ്സിൽ വെച്ച് ഒരാൾ പറഞ്ഞിരുന്നു. അത് ഇങ്ങനെ മനസ്സിൽ കിടന്നതാവാം പെട്ടന്ന് പേടിയ്ക്കാൻ കാരണം.

ഒടുവിൽ ടിക്കറ്റ് കൗണ്ടറിൽ തിരിച്ചെത്തി അവിടെ സൂക്ഷിച്ചിരുന്ന എന്റെ ബാഗ് എടുത്തു. ഞാൻ തിരിച്ചെത്തിയപ്പോൾ ടിക്കറ്റ് കൗണ്ടറിലെ ആളുകളുടെ മുഖത്തും സന്തോഷം. കാരണം തിരക്കിയപ്പോൾ അവർ പറഞ്ഞ മറുപടി എനിക്കും ഞെട്ടലുണ്ടാക്കി. ഈ കാട്ടിൽ ഇടയ്ക്ക് ആനയുടെ ശല്യം ഉണ്ടാവാറുണ്ടത്രെ. പകൽ സമയത്ത് ഇതുവരെ പ്രശ്നങ്ങൾ ഉണ്ടാക്കിയിട്ടില്ലെങ്കിലും രാത്രിയിൽ ചിലപ്പോൾ ആനയിറങ്ങാറുണ്ടെന്ന് അവർ പറഞ്ഞു. പിന്നെ ഗൈഡുകളും ഗാർഡുകളും ഇല്ലാത്ത അവസരത്തിൽ ഒരാളെ തനിച്ച അയച്ചതിലുള്ള പരിഭ്രമവും. മുളങ്കുഴിയുടെ കൂടുതൽ വിശേഷങ്ങൾ അവരോട് ചോദിച്ചുകൊണ്ട് നിൽക്കുമ്പോൾ ഒരു കാർ അവിടെ എത്തി. അതിൽ നിന്നും അഞ്ചു കുട്ടികൾ ഇറങ്ങി. കോളേജ് വിദ്യാർത്ഥികൾ ആവണം. അവരും മുളങ്കുഴികാണാൻ എത്തിയതാണ്. മുളങ്കുഴിയിലെ അപകടസാദ്ധ്യതകളെക്കുറിച്ച് പുതിയ സന്ദർശകരെ ബോധവാന്മാരാക്കുന്ന തിരക്കിലായി അവർ. വേനൽക്കാലത്ത് വീണ്ടും വരാം എന്ന് മനസ്സിൽ ഉറപ്പിച്ച ഞാൻ വീട്ടിലേയ്ക്കുള്ള എന്റെ യാത്ര ആരംഭിച്ചു.

പീരുമേട്ടിൽ നിന്നും ചില ചിത്രങ്ങൾ | Few Pictures From Peerumedu

2009-06-04T01:19:00.014+05:30

എന്നത്തേയും പോലെ ഇതും ഒരു ഔദ്യോഗിക യാത്രയായിരുന്നു. എന്റെ അധികം യാത്രകളും ജോലിയുടെ ഭാഗമായുള്ളവ തന്നെ. ഇത്തവണ യാത്ര പീരുമേടിലെ കരടിക്കുഴി എന്ന സ്ഥലത്തേയ്കാണ്. ഈ യാത്രയിൽ എടുത്ത ചില ചിത്രങ്ങൾ ഇവിടെ ചേർക്കുന്നു

കോട്ടയത്ത് നിന്നും ഏകദേശം 85 കിലോമീറ്റർ കിഴക്കായി സ്ഥിതിചെയ്യുന്ന സ്ഥലം. കാപ്പി തേയില തോട്ടങ്ങൾ നിറഞ്ഞ മനോഹരമായ ഒരു പ്രദേശമാണ് പീരുമേട്.

രാവിലെ തെളിഞ്ഞ അന്തരീക്ഷമായിരുന്നു എങ്കിലും വൈകീട്ട് ജോലികഴിഞ്ഞു മടങ്ങുമ്പോഴേക്കും മഴക്കാറും അല്പം ചാറ്റൽ മഴയും ഉണ്ടായിരുന്നു.

തൊട്ടുമുൻ‌പിൽ ഉള്ള സിഗ്നലുകൾ പോലും വ്യക്തമായി കാണാൻ കഴിയാത്ത വിധം മൂടൽ മഞ്ഞ്. ഓടിക്കൊണ്ടിരിക്കുന്ന കെ എസ് ആർ ടി സി ബസ്സിൽ നിന്നും ഒരു ഹെയർ പിൻ വളവിനു തൊട്ട്‌മുൻപെടുത്ത ചിത്രം.

ബസ്സിനുള്ളിൽ നിന്നും പുറത്തെ കാഴ്ചകൾ ഒന്നും വ്യക്തമല്ലായിരുന്നു.

ചാലിയാറിൽ നിന്നൊരു ചിത്രം

2009-01-22T11:30:00.000+05:30

ജോലിയുടെ ഭാഗമായി കേരളത്തിൽ പലസ്ഥലങ്ങളിലും പോയിട്ടുണ്ടെങ്കിലും മലപ്പുറം ജില്ലയിൽ ഒരു തവണമാത്രമേ ഇതിനു മുൻപ് പോയിട്ടുള്ളു. ഇന്നലെ മലപ്പുറം ജില്ലയിലെ അരീക്കോട് എന്ന സ്ഥലത്ത് പോകേണ്ടതായ ഒരു ആവശ്യം വന്നു. കൊടുങ്ങല്ലൂർ - തൃശ്ശൂർ - പെരിന്തൽമണ്ണ - മഞ്ചേരി വഴി അരീക്കോടെത്തിയപ്പോഴേയ്ക്കും സമയം ഉച്ചയായിരുന്നു. പിന്നീട് ജോലിയെല്ലാം തീർന്നപ്പോഴേയ്ക്കും വൈകീട്ട് നാലുമണി. തിരിച്ച് വീട്ടിൽ എത്താനുള്ള ധൃതിയായിരുന്നു പിന്നെ. എന്നാലും ചാലിയാറിന്റെ സുന്ദരമായ ചില ചിത്രങ്ങൾ എടുത്തു. അരീക്കോട് സാളി ഗ്രാമം ക്ഷേത്രത്തിനു സമീപം എടുത്തതാണ് ഈ ചിത്രങ്ങൾ.

ചാലിയാറിന്റെ ഇരുകരകളിലും ആയികെട്ടിയിരിക്കുന്ന ഈ കയറിൽ വലിച്ചാണ് തോണി അക്കരയ്ക്കും ഇക്കരക്കും എത്തിക്കുന്നത്.

മൂന്നാറിലേയ്‌ക്കൊരു യാത്ര | A Trip To Munnar

2008-12-21T20:15:00.001+05:30

വിനോദസഞ്ചാര മേഖലയ്ക്കു കേരളത്തിന്റെ സമ്പത്ത് വ്യവസ്ഥയിൽ വളരെ നിർണ്ണായകമായ ഒരു സ്ഥാനം ഉണ്ട്. കടൽത്തീരവും, കായലുകളും, മലയും കാടും എല്ലാം കേരളത്തിന് പ്രകൃതി കനിഞ്ഞുനൽകിയ സമ്പത്തുകളാണ്. ഇവിയിൽ ചില സ്ഥലങ്ങളെക്കുറിച്ചുള്ള ചെറിയ വിവരങ്ങൾ ഞാൻ എന്റെ പഴയ ചില പോസ്റ്റുകളിലൂടെ അവതരിപ്പിക്കാൻ ശ്രമിച്ചിട്ടുണ്ട്. ഇത്തവണത്തെ യാത്ര മൂന്നാറിലേയ്ക്കാണ്. കേരളത്തിന്റെ ഉതകമണ്ഡലം (ഊട്ടി) എന്നു വിശേഷിപ്പിക്കാവുന്ന ഒരു സ്ഥലം ആണ് മൂന്നാർ. ബൂലോകത്തെ എല്ലാവരും തന്നെ മൂന്നാറിന്റെ പ്രകൃതി ഭംഗി അറിയുന്നവരാണെന്നു ഞാൻ കരുതുന്നു. മൂന്നാറിനെക്കുറിച്ചുള്ള സമഗ്രമായ വിവരണം എന്ന ഉദ്ദേശം ഈ പോസ്റ്റിനില്ലെന്നു ഞാൻ ആദ്യമെ അറിയിക്കട്ടെ.
ചിത്രത്തിൽ കാണുന്നത് കേരള സംസ്ഥാന ഇലൿട്രിസിറ്റി ബോർഡിന്റെ മൂന്നാറിലുള്ള ഹെഡ് വർക്ക്സ് ആണ്. മൂന്നാറിൽ നിന്നും കേരളത്തിന്റെ ആദ്യത്തെ ജലവൈദ്യുത നിലയമായ പള്ളിവാസലിലേയ്ക്ക് വെള്ളം എത്തിക്കുന്ന സംവിധാനങ്ങളിൽ ഒന്നാണിത്. മാട്ടുപ്പെട്ടി ഡാമിൽനിന്നുള്ള വെള്ളവും പള്ളിവാസലിൽ എത്തുന്നു. ഈ ഹേഢ് വർക്ക്സ് ഉദ്ഘാടനം തിരുവിതാം‌കൂറിന്റെ അവസാന ദിവാനായ സർ സി പി രാമസ്വാമി അയ്യർ ആണ് നിർവ്വഹിച്ചത്. ഇതിനു മുകളിലൂടെ ചെറിയ വാഹനങ്ങൾക്ക് കടന്നുപോകാവുന്ന ഒരു റോഡ് ഉണ്ട്. ബൈസൺ വാലി റോഡ് എന്ന ഈ വഴിയിലെ ചില കാഴ്ചകളാണ് ഈ ബ്ലോഗിലൂടെ ഞാൻ അവതരിപ്പിക്കുന്നത്.
അടിമാലിയിൽ നിന്നും മൂന്നാറിൽ എത്തുന്നതിനു പ്രധാനമായും രണ്ടു മാർഗ്ഗങ്ങൾ ഉണ്ട്. ഒന്ന് ദേശീയപാത 49 വഴി, അടിമാലിയിൽ നിന്നും കല്ലാർ വഴി മൂന്നാറിൽ എത്താം. ഈ പത പ്രധാനമായും ജനവാസം കുറഞ്ഞ മേഖലയിലൂടെ കടന്നുപോവുന്നതാണ്. രണ്ടാമത്തേത് തോക്കുപാറ, ആനച്ചാൽ, ചിത്തിരപുരം വഴിയാണ്. ഇതു ജനസാന്ദ്രമായ പ്രദേശത്തുകൂടി കടന്നു വരുന്നു. മഴക്കാലത്ത് എപ്പോഴും അനുയോജ്യം രണ്ടാമതു പറഞ്ഞ വഴിയാണെന്നു കരുതുന്നു. മൂന്നാർ ടൗൺ എത്തുന്നതിനു എകദേശം രണ്ടു കിലോമീറ്റർ മുൻപാണ് രാമസ്വാമി അയ്യർ ഹെഢ് വർക്ക്സ്. ഹെഢ് വർക്ക്സിന്റെ ഷട്ടറുകളിൽ നിന്നും ഒഴുകുന്ന വെള്ളമാണ് ചിത്രത്തിൽ. ഹെഢ് വർക്സിനോടുചേർന്ന് ചെറിയ ഒരു ഉദ്യാനവും കെ എസ് ഇ ബിയ്ക്കുണ്ട്.

ഹെഢ് വർക്സിനോടു ചേർന്നുള്ള തേയിലത്തോട്ടത്തിന്റെ ദൃശ്യം.

ഹെഢ് വർക്സിൽ നിന്നും ഏകദേശം ഒരു കിലോമീറ്റർ പിന്നിടുമ്പോൾ താഴ്‌വരയുടെ മനോഹരമായ ദൃശ്യങ്ങൾ കാണാൻ സാധിക്കുന്ന ഒരു വ്യു പോയിന്റിൽ എത്താം. ചിത്രങ്ങൾ എടുക്കുന്ന ധാരളം വിനോദ സഞ്ചാരികളെ ഇവിടെകാണാം. തേയിലതോട്ടവും അതിനിടയിലൂടെ കടന്നു പോവുന്ന റോഡും ചെറിയ കുന്നുകളും എല്ലാം കൂടി മനോഹരമയ ഒരു ദൃശ്യം സമ്മാനിക്കുന്നു.
ബൈസൺ വാലി റോഡിൽ വളരെയധികം റിസോർട്ടുകൾ ഉണ്ട്. ഇവയിൽ പലതും അനധികൃതമണെന്ന കാരണത്താൽ സർക്കാരിന്റെ പോളിച്ചുനീക്കൽ ഭീഷിണിയുടെ മുൻപിൽ ആണ്. റിസോർട്ടുകൾ ഇത്തരത്തിൽ പൊളിച്ചുനീക്കുന്ന സർക്കാർ സംവിധാനത്തോട് എനിക്കു വിയോജിപ്പാണുള്ളത്. അനധികൃതമായി റിസോർട്ടുകൾ വന്നിട്ടുണ്ടെങ്കിൽ അത് സർക്കാർ സംവിധാനങ്ങളൂടെ പിടിപ്പുകേടിനെയാണ് സൂചിപ്പിക്കുന്നത്. ഇത്തരം റിസോർട്ട് നിർമ്മിക്കുന്നതിന് അനുമതിനൽകിയ ഉദ്യോഗസ്ഥരെ ശിക്ഷിക്കുകയും നിലവിൽ ഇത്തരത്തിലുള്ള റിസോർട്ടുകൾ സർക്കാർ ഏറ്റെടുത്ത് നടത്തുകയും വേണം എന്ന അഭിപ്രായക്കാരനാണ് ഞാൻ. ഏലപ്പാട്ട ഭൂമിയിലും, വനമേഖലയിലും റിസോർട്ടുകൾ അനധികൃതമായി മേലിൽ നിർമ്മിക്കപ്പെടാതിരിക്കുന്നതിനും സർക്കാർ ശ്രദ്ധിക്കണം. ഈ വിവാദങ്ങൾക്കിടയിലും സ്വദേശീയരും വിദേശീയരുമായ ധാരളം വിനോദസഞ്ചാരികൾ ഇവിടെ എത്തുന്നു എന്നത് ആശ്വാസം തന്നെ.
വീണ്ടും മുൻപോട്ടു നടന്നാൽ ഇരുവശവും ഏലച്ചെടികളാണ്. കാടിനു നടുവിലായി വന്മരങ്ങൾ വെട്ടിമാറ്റാതെതന്നെ അവയുടെ ഇടയിൽ ഏലം കൃഷിചെയ്തുവരുന്നു. ഇത്തരത്തിലുള്ള ഏലം കൃഷിത്തോട്ടങ്ങളിൽ ചിലതാണ് റിസോർട്ട് നിർമ്മാണത്തിന് ഉപയോഗിച്ചതെന്നു സർക്കാർ കണ്ടെത്തിയത്. സുഗന്ധവ്യഞ്ജനങ്ങളുടെ റാണിയായ ഏലത്തിന്റെ വിലകുറഞ്ഞതാവാം ഇത്തരം ഒരു മാറ്റത്തിനു പലരേയും പ്രേരിപ്പച്ചത്.

ഏലത്തോട്ടത്തിനു നടുവിലൂടെയുള്ള ബൈസൺ‌വാലി റോഡ്.

ഏറ്റവും കൂടുതൽ കീടനാശിനിപ്രയോഗം നടക്കുന്ന ഒന്നാണ് ഏലം കൃഷി. പൂക്കുന്നതുമുതൽ ഏലം പാകമവുന്നതുവരെയുള്ള കാലയളവിൽ എറ്റവും ചുരുങ്ങിയത് ഏഴുതവണയെങ്കിലും കീടനാശിനികൾ തളിക്കുമത്രേ. അതുകൊണ്ടുതന്നെ ഏലക്കായയുടെ തൊണ്ടിൽ വളരെയധികം കീടനാശിനികൾ അടങ്ങിയിരിക്കുമെന്ന് ചിലർ മുന്നറിയിപ്പുതരുന്നു. ഇവിടെ നിന്നും ഒരു കിലോമീറ്റർ കൂടികഴിഞ്ഞാൽ പോതൻ‌മേട് എന്ന ചെറിയ ഗ്രാമത്തിൽ എത്താം. ഗ്രാമം എന്നു വിളിക്കാമോ എന്നു തീർച്ചയില്ല. വളരെക്കുറച്ചു തോട്ടം തൊഴിലാളികളായ തമിഴർ താമസിക്കുന്ന സ്ഥലമാണിത്.

പോതൻ‌മേട്

മഴക്കാലത്താണ് ഈ റോഡിലൂടെ പോവുന്നതെങ്കിൽ പാറക്കെട്ടിൽനിന്നും വരുന്ന ഇത്തരം ചെറിയ നീർച്ചാലുകളും കാണാം.

പോതൻ‌മേടിലെ ഒരു വ്യൂ പോയിന്റിൽ നിന്നുള്ള ദൃശ്യം. മേഘങ്ങൾ ചുംബിക്കുന്ന ഒരു കുന്ന്. ഇവിടെയും ചില ചെറിയ റിസോർട്ടുകൾ ഉണ്ട്.
അവിടെനിന്നും കുറച്ചുകൂടി യാത്രചെയ്താൽ കാണുന്ന റിസോറ്ട്ടുകളിൽ ഒന്നിലേയ്ക്ക് പോവാം. കാടിനു നടുവിൽ മൂന്നാർ നഗരത്തിന്റെ തിരക്കുകളിൽ നിന്നും വിട്ടൊഴിഞ്ഞ് പ്രകൃതിസുന്ദരവും ശാന്തവുമായ അന്തരീക്ഷത്തിൽ ഉള്ള കൊച്ചു കൊച്ചു വീടുകൾ ആണ് ഈ റിസോർട്ടുകളുടെ പ്രത്യേകത. സ്വതന്ത്രമായ വില്ലകൾ.
അത്ത്രത്തിൽ ഉള്ള കോട്ടേജുകളിൽ ഒന്ന്. പൂമുഖവും, സ്വീകരണമുറിയും, കിടപ്പുമുറിയും, എന്തിന് അടുക്കളപോലും ഉണ്ട് ഈ വില്ലകളിൽ. സകുടുംബം വരുന്ന ചില ഉത്തരേന്ത്യൻ വിനോദസഞ്ചാരികൾ സ്വന്തം പാചകക്കാരേയും കൊണ്ടാണത്രെ വരുന്നത്. അവർക്കാവശ്യമുള്ള ഭക്ഷണം പാചകം ചെയ്യുന്നതിനുള്ള സൗകര്യവും ചില റിസോർട്ടുകളിൽ ലഭ്യമാണ്. എന്നാലും മിക്കാവാറും റിസോർട്ടുകൾ ഭക്ഷണം ഉൾപ്പടെയുള്ള പാക്കേജായിട്ടാണ് താമസസൗകര്യം ഒരുക്കുന്നത്.

ഇതാ മറ്റൊരു കോട്ടേജിന്റെ ചിത്രം. കാടിനു നടുവിൽ എല്ലാ ആധുനിക സൗകര്യങ്ങളോടെയും ഉള്ള ഒരു സ്ഥലത്ത് ശാന്തസുന്ദരമായ അന്തരീക്ഷത്തിൽ ഒഴിവുദിവസം ചെലവൊഴിക്കാൻ ആഗ്രഹിക്കുന്നവർക്ക് എന്തുകൊണ്ടും അനുയോജ്യമാണ് ഇവിടം.
പല റിസോർട്ടുകളിലും മനോഹരമായ ഉദ്യാനങ്ങളും ഉണ്ട്. കൂടെ ഏലവും, ഈറ്റയും എല്ലാം കാണാം.

അടിമാലിയിൽ നിന്നും മൂന്നാറിലേയ്ക്കുള്ള ദേശീയപാതയുടെ ഇരുവശത്തും പലസ്ഥലങ്ങളിലും സമൃദ്ധമായ ഈറ്റക്കാടുകൾ ഉണ്ട്. ആനയുടെ ഇഷ്ടവിഭവമാണ് ഈറ്റ. ഈറ്റതിന്നുന്നതിനിറങ്ങുന്ന ആനക്കൂട്ടങ്ങൾ രാത്രികാലങ്ങളിൽ പലപ്പോഴും സഞ്ചാരികൾക്ക് ഭീഷിണിയാവാറുണ്ട്. അതുകൊണ്ടുതന്നെ രാത്രി അധികം വൈകി ഈ വഴിയുള്ള യാത്ര ഉപേക്ഷിക്കുന്നതാണ് നല്ലത്.
അല്പം സാഹസീകത ആഗ്രഹിക്കുന്നവർക്ക് അതിനുള്ള സൗകര്യവും ചില റിസോർട്ടുകളിൽ ഉണ്ട്. അത്തരത്തിലുള്ള ഒന്നാണ് ഈ ചിത്രത്തിൽ. പടികൾ വഴി മുകളിലെ മരംകൊണ്ടുള്ള പ്ലറ്റ്‌ഫോമിലും അവിടെനിന്നും റോപ്പ്‌വേ വഴി അടുത്തുള്ള പാറക്കെട്ടിലും ഇറങ്ങാം. പാറക്കെട്ടിൽ നിന്നും ഇറങ്ങുന്നതിനു റോപ്പ് ലാഡറും ഉണ്ട്. അധികം അപകടം ഇല്ലാ‍ത്ത സുരക്ഷിതമായ ഒരു സാഹസികത.

ആ പാറക്കെട്ടും റോപ്പ് ലാഡറും ആണ് ചിത്രത്തിൽ.

സാഹസികത ഇഷ്ടമല്ലാത്തവർക്കായി ചുറ്റിനടക്കാനും സ്വസ്ഥമായിരുന്നു സല്ലപിക്കാനും ഉള്ള ഉദ്യാനവും ഉണ്ട്. മനോഹരമായ പൂക്കളുടെ ഭംഗി ആസ്വദിച്ചുകൊണ്ട് ഒരു നടത്തവും ആവാം.

ഇതാ ഏലച്ചെടികൾക്കു നടുവിലായി മറ്റൊരു കോട്ടേജ്.

കേരളത്തിൽ വന്നാൽ കരകൗശലവസ്തുക്കൾ വാങ്ങാതെ പോവുകയോ? യാത്രയുടെ ഓർമ്മയ്കായി എന്തെങ്കിലും വാങ്ങണ്ടെ. അതിനും വെളിയിൽ എങ്ങും പോകേണ്ട. കരകൗശല വസ്തുക്കൾ വിൽക്കുന്ന കടകളും ചില റിസോർട്ടുകളിൽ ഉണ്ട്.
ഈ സ്റ്റാളിൽ എന്നെ ഏറ്റവും ആകർഷിച്ചത് ഇതാണ്. പൂർണ്ണമായും നാളികേരത്തിൽ കൊത്തിയെടുത്ത ചില രൂപങ്ങൾ. ആനയും, ഗണപതിയും, കുരങ്ങനും എല്ലാം ഉണ്ടിതിൽ.

എത്രകണ്ടാലും മതിവരാത്ത ഒരു പാടു വിശേഷങ്ങൾ മൂന്നാറിലുണ്ട്. ഇതു അതിന്റെ വളരെ ചെറിയ ഒരു ചിത്രം മാത്രം. മൂന്നാർ മാത്രമല്ല വാഗമൺ, കുട്ടിക്കാനം, പീരുമേട്, പൊന്മുടി അങ്ങനെ എത്രയെത്ര ഹിൽ സ്‌റ്റേഷനുകൾ നമുക്കുണ്ട്. ഇവിയെല്ലാം പൂർണ്ണമായും ശ്രദ്ധയിൽ കൊണ്ടുവരുന്നതിനുള്ള സംരംഭങ്ങളാണ് നമുക്കാവശ്യം.

വോൾവോ റേസ് വില്ലേജ് (ചിത്രങ്ങൾ)

2008-12-09T00:05:00.002+05:30

വോൾവോ ഓഷ്യൻ റേസ് അതിന്റെ ചരിത്രത്തിൽ ആ‍ദ്യമായി ഇന്ത്യയിലൂടെ കടന്നുപോവുന്നു. ഇന്ത്യയിലെ അതിന്റെ താവളം അറബിക്കടലിന്റെ റാണിയായ കൊച്ചിയാണ്. കൊച്ചിയിലെ വില്ലിങ്ങ്‌ഡൺ ഐലന്റിലെ വോൾവോ ഓഷ്യൻ റേസ് വില്ലേജിൽ നിന്നുള്ള ചില ചിത്രങ്ങൾ ഇവിടെ ചേർക്കട്ടെ.

ഐലന്റിലെ വോൾവോ വില്ലേജിന്റെ കവാടം
അറ്റകുറ്റപ്പണികൾക്കായി കയറ്റിയിരിക്കുന്ന യാട്ടുകൾ

ഈ അഭ്യാസം കടലിൽ ചെയ്യുന്നത് ഓർക്കുമ്പോൾ ഒരു പേടി

വോൾവോ റേസ് വില്ലേജിലെ സന്ദർശകരുടെ തിരക്കു
വോൾവോ റേസിനെപ്പറ്റിയുള്ള ഹ്രസ്വചിത്രം പ്രദർശിപ്പിക്കുന്ന തീയറ്റർ
വോൾവോ റേസ് വില്ലേജിലെ കലാപരിപാടികൾ നടക്കുന്ന വേദി

കടലിൽ പോകാതെതന്നെ റേസിന്റെ ത്രിൽ അനുഭവിക്കണോ? എങ്കിൽ ദാ ഈ സ്റ്റിമുലേറ്ററിൽ കയറിയാൽ മതി.

റേസ് വില്ലേജിൽ പ്രദർശനത്തിനു വെച്ചിട്ടുള്ള വോൾവോയുടെ വിവിധ വാഹനങ്ങൾ

വോൾവോ റേസ് വില്ലേജിൽ ഒരുക്കിയിരിക്കുന്ന പ്രദർശനത്തിലെ ഐ എസ് ആർ ഒ യുടെ സ്റ്റാൾ.
കനോയിങ് ആന്റ് കയാക്കിങ് അസ്‌സോസിയേഷൻ (കേരള) ന്റെ സ്റ്റാൾ
അമൃത ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിന്റെ ടെലിമെഡിസിൻ യൂണിറ്റ്. ഉപഗ്രഹ സംവിധാനം വഴി ചികിത്സ സാധ്യമാക്കുക എന്നതാണ് ഇതിന്റെ പ്രത്യേകത.

മാവേലിക്കരയിലെ ബുദ്ധപ്രതിമ | Statue of Buddha at Mavelikkara

2008-11-23T01:00:00.002+05:30

പണ്ടെപ്പോഴോ ബൂലോകത്തിൽ കറങ്ങുന്നതിനിടയിലാണ് മാ‍വേലിക്കരിയിൽ ശ്രീബുദ്ധന്റെ ഒരു പ്രതിമ ഉള്ളതായി അറിഞ്ഞത്. അന്നു മനസ്സിൽ തീരുമാനിച്ചു എന്നെങ്കിലും മാവേലിക്കരയ്ക്കു പോവുമ്പോൾ ബുദ്ധഭഗവാന്റെ ഈ ബിംബം കാണണമെന്നും അതിന്റെ ഒരു ചിത്രമെങ്കിലും എന്റേതായി ബൂലോകർക്കായി സമർപ്പിക്കണമെന്നും. ഇന്നു അത്തരത്തിൽ മവേലിക്കരയ്ക്കു ഒരു യാത്ര സാധ്യമായി. ഔദ്യോഗിക കാര്യങ്ങൾ തീർന്നപ്പോൾ കൂടെയുണ്ടായുന്ന പാറശ്ശാലക്കാരനെങ്കിലും കുറച്ചുകാലമായി മാവേലിക്കരയിലുള്ള ആന്റണി എന്ന സുഹൃത്തിനോടു ഈ ബുദ്ധപ്രതിമയെപ്പറ്റി ചോദിച്ചു. ഞങ്ങൾ അപ്പോൾ നിന്നിരുന്ന സ്ഥലത്തിനും അൻപതുമീറ്റർ മാറി ഒരു ശ്രീകൃഷണസ്വാമി ക്ഷേത്രം ഉണ്ടെന്നും അതിന്റെ മുൻപിലായാണ് ബുദ്ധഭഗവാന്റെ ഈ പ്രതിമ ഉള്ളതെന്നും ആന്റണി പറഞ്ഞു. ഞങ്ങൾ അങ്ങോട്ടു നടന്നു.
ഈ ചിത്രത്തിൽ കാണുന്നതാണ് ശ്രീബുദ്ധഭഗവാന്റെ പ്രതിമ സ്ഥപിച്ചിരിക്കുന്ന മണ്ഡപം. ഇന്നു ഇതൊരു സംരക്ഷിത സ്മാരകം ആണ്. സംസ്ഥാന പുരാവസ്തു വകുപ്പിന്റെ കീഴിലാണ് ഇതിപ്പോൾ. പുരാവസ്ത വകുപ്പു ഇവിടെ സ്ഥാപിച്ചിരിക്കുന്ന ഫലകത്തിൽ ഇതു 10ആം നൂറ്റാണ്ടിലേതാണെന്നു പറയുന്നു. അതായതു ആയിരത്തോളം വർഷം പഴക്കമുള്ള ഒന്ന്. മാവേലിക്കര ശ്രീകൃഷ്ണസ്വാമി ക്ഷേത്രത്തിന്റെ മുൻപിലാണ് ഈ മണ്ഡപം. “ബുദ്ധ ജംങഷൻ” എന്നാണ് ഈ കവല അറിയപ്പെടുന്നത്. ഇതിനോടു ചേർന്നുള്ള മാവേലിക്കര കോവിലകത്തിന്റെ ഒരു ഭാഗം ഏതാണ്ട് പൂർണ്ണമായും നശിച്ചു കഴിഞ്ഞു.

ഇരുപതാം നൂറ്റാണ്ടിന്റെ ആദ്യത്തിൽ കണ്ടിയൂർ ക്ഷേത്രത്തിന്റെ സമീപത്തുള്ള പാടത്തുനിന്നും യാദൃശ്ചികമായി ഒരു ഉദ്ഖനനത്തിനിടെ ലഭിച്ചതാണ് ഈ വിഗ്രഹം. 1923-ൽ ആണ് ഇതിവിടെ സ്ഥാപിച്ചത്. ഒരു കാലഘട്ടത്തിൽ മാവേലിക്കരയും സമീപപ്രദേശങ്ങളും ബുദ്ധന്റെ അനുയായികളുടെ പ്രധാനകേന്ദ്രമായിരുന്നു എന്നതിനു തെളിവാണ് ഈ ബിംബം. ഇതു അച്ചൻ‌കോവിലാറിൽ നിന്നും കണ്ടെടുത്തതാണെന്ന ഒരു വാദവും ഉണ്ട്.
കുറച്ചുകൂടെ വ്യക്തമായ ചിത്രം. വെളിച്ചം കുറവായിരുന്നതും, ഫോട്ടോഗ്രാഫിയിലുള്ള എന്റെ പ്രവീണ്യക്കുറവും കാരണം വ്യക്തമായ ചിത്രം എടുക്കാൻ സാധിച്ചില്ല. വളരെ വ്യക്തമായ ചിത്രങ്ങൾ വിക്കിയിൽ ലഭ്യമാണ്.

ധ്യാനനിമഗ്നനായിരിക്കുന്ന ബുദ്ധഭഗവാൻ. ശാന്തമായ് ഒരു പുഞ്ചിരിയാണ് ആ മുഖത്ത്. മുഖത്തിന്റെ ആ ശാന്തത എന്റെ ഈ ചിത്രങ്ങളിൽ വ്യക്തമല്ല.

(വിവരങ്ങൾക്കു കടപ്പാട് വിക്കി. )

സ്വാതന്ത്ര്യദിനത്തിലെ കായൽ യാത്ര

2008-08-15T22:00:00.000+05:30

ഇന്നു ഭാരതം അതിന്റെ 62-ആം സ്വാതന്ത്ര്യദിനം ആഘോഷിക്കുമ്പോൽ വൈപ്പിനിൽ നിന്നും കൊച്ചിക്കായലിലൂടെ എറണാകുളത്തേയ്ക്കു നടത്തിയ ഒരു യാത്രയിൽ എടുത്ത ചിലചിത്രങ്ങൾ ഇവിടെ ചേർക്കുന്നു. ഇന്നത്തെ പ്രത്യേകത മിക്കവാറും എല്ലാ കപ്പലുകളും, മറ്റു യാനങ്ങളും പലതരം പതാകകൾകൊണ്ട് അലങ്കരിച്ചിരിക്കുന്നു എന്നതാണ്. റിപബ്ലിക് ദിനത്തിലും സ്വാതന്ത്ര്യദിനത്തിലും മാത്രമാണ് ഇത്തരം ഒരു കാഴ്ച കാണാൻ സാധിക്കുക.

യാത്ര ആരംഭിച്ച വൈപ്പിൻ ബസ്‌സ്‌റ്റേഷനു സമീപം ഉള്ള കനൊസ്സ യു പി സ്കൂൾ ദേശീയപതാകയുടെ പ്രൗഢിയിൽ.
ലക്ഷദ്വീപിലേക്കുള്ള ഒരു യാത്രാക്കപ്പലായ എം വി മിനിക്കോയ്. ദേശീയപതാകയോടൊപ്പം പല പതാകകളും കൊണ്ട് അലങ്കരിച്ച നിലയിൽ.
കൊച്ചിൻ പോർട്ട് ട്രസ്റ്റിന്റെ എം വി ബാലി എന്ന ടഗ്ഗ്. ഇതിലും ഒട്ടനവധി പതാകകൾ കാണാം.
“പ്രതിഭ ഇന്ദ്രായണി” എന്ന ക്രൂഡ് ഓയിൽ ഷിപ്.
വൈപ്പിനിലേക്ക് എറണാകുളത്തുനിന്നും പുറപ്പെടുന്ന യാത്രാബോട്ട്. പുതിയ ബോട്ട് ജെട്ടിയുടെ വ്യു പോയിന്റിൽ നിന്നും എടുത്ത ചിത്രം.
എറണാകുളം ഹൈക്കോടതി ജെട്ടിക്കു സമീപത്തുന്നിന്നും ഒരു ദൃശ്യം. ലക്ഷദ്വീപ് ഭരണസമിതിയുടെ കീഴിലുള്ള ചില ആഢംബര യാനങ്ങൾ.
“വിജയീ വിശ്വ തിരംഗാ പ്യാരാ
ഝംടാ ഊംചാ രഹെ ഹമാരാ”

ഹരിപ്പാട് ശ്രീ രാമകൃഷ്ണാശ്രമം.

2008-06-10T02:00:00.003+05:30

ഇന്റര്‍‌നെറ്റും ചാറ്റിങ്ങും വളരെ അധികം നല്ല സുഹൃത്തുക്കളെ എനിക്കു നല്‍‌കിയിട്ടുണ്ടു. ഞങ്ങള്‍ ഇടക്കു ഒത്തുകൂടി ചിലയാത്രകളും നടത്താറുണ്ട്‌. അത്തരം യാത്രകളില്‍ എടുക്കുന്ന ചിത്രങ്ങളാണ് എന്റെ പഴയ പല പോസ്റ്റുകളിലും ഞാന്‍ ചേര്‍‌ത്തിട്ടുള്ളത്‌. കഴിഞ്ഞ ദിവസവും അത്തരം ഒരു യാത്ര ഞങ്ങള്‍ നടത്തുകയുണ്ടായി. ഞങ്ങളുടെ ചില സുഹൃത്തുക്കളുടെ വീടുകള്‍ സന്ദര്‍ശിക്കുകയായിരുന്നു പ്രധാന ഉദ്ദേശ്യം. അങ്ങനെ അവസാനം ഞങ്ങള്‍ എത്തിയതു ഞങ്ങള്‍‌ക്കു ജ്യേഷ്‌ഠതുല്ല്യനായ സഞ്ചുവേട്ടന്റെ ഹരിപ്പാട്ടുള്ള വീട്ടില്‍ ആണ്. അവിടെ അടുത്തുതെന്നെ കണ്ട തകര്‍ന്ന ഒരു കെട്ടിടം ഞങ്ങളുടെ ശ്രദ്ധയാകര്‍‌ഷിച്ചു. അപ്പോള്‍ സഞ്ചുവേട്ടനാണ് പറഞ്ഞത്‌ അതു ഹരിപ്പാട്‌ ശ്രീ രാമകൃഷ്ണാശ്രമം ആണെന്ന്‌. കേരളത്തിലെ ആദ്യത്തെ രാമകൃഷ്ണാശ്രമം. അതു തികച്ചും ഒരു പുതിയ അറിവായിരുന്നു ഞങ്ങള്‍ക്ക്‌. ഹിന്ദു ധര്‍മ്മത്തിലെ അപചയങ്ങള്‍‌ക്കെതിരെ പ്രവര്‍ത്തിച്ച ശ്രീ രാമകൃഷ്ണപരമഹംസരുടെയും, സ്വാമി വിവേകനന്ദന്റേയും, മറ്റും ആശയങ്ങളില്‍ നിന്നും ഉടലെടുത്ത രാമകൃഷ്ണാമിഷന്റെ കീഴില്‍ കേരളത്തില്‍‌ സ്ഥാ‍പിതമായ ആദ്യ ആശ്രമത്തിന്റെ ഇന്നത്തെ അവസ്ഥ ശരിക്കും വേദനാജനകം തന്നെയാണ്. ഈ ആശ്രമത്തെപ്പറ്റി അവിടെനിന്നും പിന്നീട്‌ ഇന്റെര്‍‌നെറ്റില്‍‌ നിന്നും ശേഖരിച്ച ചില വിവരങ്ങള്‍‌ ഇവിടെ ചേര്‍ക്കുന്നു.

ഇതു ഈ ആശ്രമത്തിന്റെ തറക്കല്ലിട്ടതിന്റെ സൂചകമായി പ്രധാനകവാടത്തിലുള്ള ശിലാഫലകം. ഇതില്‍ പറയുന്നതനുസരിച്ചു ശ്രീരാ‍മകൃഷ്ണപരമഹംസരുടെ ശിഷ്യനായിരുന്ന ശ്രീ നിര്‍മ്മലാനന്ദ സ്വാമികള്‍ 1912 സെപ്തംബര്‍ മാസം നലാം തീയതി കൃഷ്ണാഷ്ടമി ദിവസം രാവിലെ ഈ ആശ്രമത്തിന്റെ ശിലാസ്ഥാപനം നിര്‍വഹിച്ചു എന്നാണ്. എന്നാല്‍‌ സ്വമി നിര്‍മ്മലാനന്ദജിയെപ്പറ്റി ശ്രീ രാമകൃഷ്ണാമിഷന്‍‌ പ്രസിദ്ധീകരിച്ച പുസ്തകത്തില്‍ 1912 സെപ്റ്റംബര്‍‌ പതിനൊന്നിനു തന്റെ മൂന്നാമത്തെ കേരളസന്ദര്‍‌ശനവേളയിലാണ് സ്വാമികള്‍ ഇതിന്റെ ശിലാസ്ഥാപനം നടത്തിയത്‌ എന്നാണ് പറയുന്നത്‌.

ഇതു ആശ്രമത്തിന്റെ ഇന്നത്തെ ചിത്രം. ബ്രഹ്മചാരി വെങ്കിടസുബ്രഹ്മണ്യ അയ്യര്‍‌ നല്‍കിയ സ്ഥലത്താണ് അന്ന്‌ ഈ ആശ്രമം പണിതതു. അദ്ദേഹം പിന്നീടു സന്യാസം സ്വീകരിക്കുകയും സ്വാമി ചിത്‌സുഖാനന്ദ എന്ന പേരില്‍ പ്രശസ്തനാവുകയും ചെയ്തു. അന്നു ആശ്രമത്തിന്റെ നിര്‍മ്മാണത്തിനാവശ്യമായ പ്രധാന സംഭവന വക്കീലും രാമകൃഷ്ണ അസോസിയേഷന്റെ വൈസ്‌ പ്രസിഡന്റും ആയിരുന്നു ശ്രീ സുബ്ബരായ അയ്യര്‍ നല്‍കിയ ആയിരം രൂപയും ആയിരുന്നു.

ആശ്രമത്തിലെ പ്രധാന പ്രാര്‍ത്ഥനാമുറിയും പൂജാമുറിയും ആണ് ചിത്രത്തില്‍. ഒരു കാ‍ലത്തു സമൂഹം തഴ്ന്ന ജാതിക്കാര്‍ എന്നു പ്രഖ്യാപിച്ചു അകറ്റിനിറിത്തിയിരുന്നവര്‍ക്കും ഇവിടെ പ്രവേശനവും പൂജകളില്‍ പങ്കെടുക്കുന്നതിനുള്ള അവകാശവും ഉണ്ടായിരുന്നു. ജാതിമത ഭേതമന്യേ എല്ലാവരും ഒന്നിച്ചു പ്രസാദം കഴിച്ചിരുന്നതും ഇവിടെത്തന്നെയാണ്. അയിത്തം ഒഴിവക്കുന്നതിനു ആശ്രമം സമൂഹഭോജനം സംഘടിപ്പിച്ചിരുന്നതും ഇവിടെത്തന്നെ.

ഒട്ടനവധി പ്രമുഖരുടെ സംഗീതകച്ചേരികള്‍ക്കും അരങ്ങേറ്റത്തിനും ഈ മുറി സാക്ഷ്യം വഹിച്ചിട്ടുണ്ട്‌. പ്രശസ്ത സംഗീതസംവിധായകന്‍ എം ജി രാധാകൃഷ്ണന്റെ അരങ്ങേറ്റവും ഇവിടെ ആയിരുന്നെന്ന്‌ പറയപ്പെടുന്നു. കൂടതെ നിത്യവും രാവിലെയും വൈകീട്ടും ഭജന ഉണ്ടായിരുന്നതായി പറയപ്പെടുന്നു. ഇതില്‍ എല്ലാവിഭാഗക്കാരും പങ്കെടുത്തിരുന്നു.

ഇതു പ്രധാന പൂജാമുറിയുടെ ഉള്‍ഭാഗത്തിന്റെ ചിത്രം. ഇവിടെ രാമകൃഷ്ണപരമഹംസരുടേയും, ശാരദാ‌ദേവിയുടേയും, സ്വാമി വിവേകനന്ദന്റേയും ചിത്രങ്ങള്‍ ഉണ്ടായിരുന്നു. ഇന്നു രാമകൃഷ്ണാമിഷന്റെ മങ്ങിത്തുടങ്ങിയ ചിഹ്നം മാത്രം കാണാം.

രാമകൃഷ്ണാമിഷന്റെ മായാതെ അവശേഷിച്ച ചിഹ്നം.

ആശ്രമം നിര്‍മ്മിക്കുന്നതിനാവശ്യമായ സ്ഥലം നല്‍കിയത്‌ ബ്രഹ്മചാരി വെങ്കിടസുബ്രഹ്മണ്യ അയ്യര്‍‌ ആണ്. അദ്ദേഹം പിന്നീ‍ട്‌ സന്യാസി ആവുകയും ഒടുവില്‍ ആയിരത്തിതൊള്ളയിരത്തി എഴുപത്തിമൂന്ന്‌ സെപ്റ്റംബര്‍ ഇരുപത്തിഅഞ്ചാം തീയതി ഇവിടെവെച്ചു സമാധിഅടയുകയും ചെയ്തു. ആശ്രമവളപ്പില്‍‌ ഉള്ള അദ്ദേഹത്തിന്റെ സമാധിസ്ഥലം ആണിത്‌.
ആശ്രമത്തിലെ പ്രധാന പൂജാമുറിയുടെ പുറത്തുള്ള ചെറിയ ഗണപതിവിഗ്രഹം. ഇത്രയും കാലത്തിനിടയിലും ഇതിനു കാര്യമായ കേടുപാടുകള്‍ സംഭവിച്ചിട്ടില്ല.
ഗണപതി വിഗ്രഹത്തിനു മറുവശത്തു പൂജമുറിക്കു പുറത്തുള്ള മറ്റൊരു വിഗ്രഹം. ഇതു എതു ദേവന്റേതാണെന്നു എനിക്കറിയില്ല.
1912 മുതല്‍‌ 1978 വരെ ഈ ആശ്രമം ഇവിടെ പ്രവര്‍ത്തിച്ചിരുന്നു. തുടര്‍ന്നുണ്ടാ‍യ ചില തര്‍ക്കങ്ങള്‍‌ ആശ്രമത്തെ കോടതിവ്യവഹാരത്തില്‍ എത്തിച്ചു. തുടര്‍ന്നു ആശ്രമം അടച്ചുപൂട്ടുകയാ‍യിരുന്നു. ഈ സമയത്തിനിടക്കു ആശ്രമത്തിന്റെ കീഴില്‍ ഒരു വിദ്യാലയവും, ആതുരാലയവും, വായനശാലയും പ്രവര്‍ത്തിച്ചിരുന്നു. ഇന്നു ആതുരാലയം മാത്രം അവശേഷിക്കുന്നു. ഇതു ഇന്നു സര്‍ക്കാര്‍‌ പ്രാഥമിക ആരോഗ്യ കേന്ദ്രം ആണ്. ആശ്രമത്തിന്റെ കീ‍ഴിലുള്ള വിദ്യാലയത്തില്‍ ജാതിമത ഭേദമന്യേ എല്ലവര്‍ക്കും വിദ്യാഭ്യസത്തിനുള്ള സൌകര്യം ഉണ്ടായിരുന്നു. ഈ പ്രദേശത്തു ആദ്യമായി അലോപ്പതി ചികിത്സാ‍സമ്പ്രദായം എത്തീച്ചതും ഇംഗ്ലീഷ് വിദ്യാഭ്യാസം ആരംഭിച്ചതും ആശ്രമം തന്നെ.
ഇപ്പോള്‍ കോടതിയില്‍ ഉള്ള കേസുകളില്‍ ആശ്രമത്തിനു അനുകൂലമായ വിധി വന്നിട്ടുള്ളതായും ഈ സ്ഥലത്തു ഒരു പുതിയ ആശ്രമം നിര്‍മ്മിക്കാന്‍ പോവുന്നതായൂം അറിയാന്‍ കഴിഞ്ഞു. ഒരുകാലഘട്ടത്തില്‍ കേരളത്തിന്റെ സാമൂഹ്യനവോത്ഥാനത്തിനു കാര്യമായ സംഭാവനകള്‍ നല്‍കിയ ഈ സ്ഥാപനം വീണ്ടും ഉയര്‍‌ത്തെണീക്കും എന്ന പ്രതീക്ഷയോടെ ഈ ബ്ലോഗു നിങ്ങളുടെ വിമര്‍ശനങ്ങള്‍ക്കും അഭിപ്രായങ്ങള്‍ക്കുമായി സമര്‍‌പ്പിക്കുന്നു.

അതിരപ്പിള്ളി - ദൈവത്തിന്റെ സ്വന്തം വെള്ളച്ചാട്ടം.

2008-05-28T01:00:00.001+05:30

ഇതു ദൈവത്തിന്റെ സ്വന്തം നാട്ടിലെ ഏറ്റവും പ്രകൃതിരമണീയമായ വെള്ളച്ചാട്ടം - അതിരപ്പിള്ളി. കേരളത്തിലെ തൃശ്ശൂര്‍‌ജില്ലയില്‍ ചാലക്കുടിപട്ടണത്തില്‍‌നിന്നും മുപ്പത്തിഒന്ന്‌ കിലോമീറ്റര്‍‌ അകലേ സ്ഥിതിചെയ്യുന്ന മനോഹരമായ സ്ഥലം. ഇവിടെ എത്തിച്ചേരാന്‍‌ രണ്ടുവഴികള്‍ ഉണ്ട്‌. ഒന്നു അങ്കമാലിയില്‍‌നിന്നും മഞ്ഞപ്രവഴി കേരള പ്ലാന്റേഷന്‍ കോര്‍‌പ്പറേഷന്റെ തോട്ടത്തിനു നടുവിലൂടെ ഒരു ചെറിയ കടത്തു കടന്ന് വീണ്ടും റോഡ്‌മാര്‍ഗ്ഗം അതിരപ്പിള്ളിയില്‍ എത്താം. ഇതു എറണാകുളത്തുനിന്നും വരുന്നതുനുള്ള ഏറ്റവും എളുപ്പവഴിയാണ്. എന്നാല്‍‌ അല്പം വീതികുറവും കടത്തുകടക്കാനുള്ള ബുദ്ധിമുട്ടും കാരണം അധികം ആളുകളും തിരഞ്ഞേടുക്കുന്നതു രണ്ടാമത്തെ വഴിയാണ്. ചാലക്കുടിപട്ടണത്തില്‍‌നിന്നും നേരെറോഡ്‌മാര്‍ഗ്ഗം അതിരപ്പിള്ളിയിലേക്കു. രണ്ടുതവണ അതിരപ്പിള്ളിയില്‍ പോയിട്ടുണ്ടു. അപ്പോള്‍‌ ഈ രണ്ടു വഴിയും പരീക്ഷിച്ചുനോക്കി. ഈ രണ്ടുയാത്രകളിലും എടുത്ത ചിത്രങ്ങള്‍‌ചേര്‍ത്തു നിങ്ങള്‍‌ക്കായി സമര്‍പ്പിക്കുന്നു.

ഇതു കേരള പ്ലന്റേഷന്‍ കോര്‍‌പ്പറേഷന്റെ വെറ്റിലപ്പാറ തോട്ടത്തിലൂടെയുള്ള വഴിയാണ്. റബ്ബറും, എണ്ണപനയുമാണ്‍` ഇവിടത്തെ പ്രധാന കൃഷി. തികച്ചും മനോഹരമായ സ്ഥലം. ഇക്കൊടൂറിസം പ്രോജെക്ട്‌ നടപ്പാക്കാന്‍ പദ്ധതിയുണ്ടെന്നാണ് കേള്‍ക്കുന്നതു. ഇത്തരത്തില്‍ കുറേതോട്ടങ്ങള്‍ ഉണ്ട്‌ പ്ലന്റേഷന്‍ കോര്‍‌പ്പറേഷന്. പലതും ഇപ്പോള്‍‌ നഷ്ടത്തിലും ആണ്. ഇക്കോടൂറിസം കോര്‍‌പ്പറേഷനു ലാഭകരമായ ഒന്നാവും എന്നു പൊതുവെ പറഞ്ഞു കേള്‍ക്കുന്നു.

ഇതാണ് എണ്ണപന. കേരളത്തില്‍ നാളികേര കര്‍ഷകന്‍ തേങ്ങക്കു വിലയില്ലാത്തതില്‍ വിലപിക്കുമ്പോള്‍ ഇങ്ങനെ എണ്ണപനകൃഷി പ്രൊത്സാഹിപ്പിക്കാന്‍ കാരണം എന്താണെന്നു അറിയില്ല. എന്തായാലും ഇതു സമീപഭാവിയില്‍ ഒന്നും ആരംഭിച്ചതല്ല.

ഇതു മൂത്തുപാകമായ പനങ്കുലകള്‍ ആണ്. പാം ഓയില്‍ ഉണ്ടക്കുന്നതു ഇവിടെ അല്ല. ഇവ ഇവിടെന്നിന്നും ഇവ ആ ഫാക്ട്രിയില്‍ എത്തിക്കുന്നു. വെറ്റിലപ്പാറ ഫാക്ടറിയില്‍ പ്രധാനമായും റബ്ബര്‍‌ സംസ്കരണമാണ് നടക്കുന്നതു.

ഇതു എണ്ണപനതോട്ടത്തിലൂടെയുള്ള ഒരു നടപ്പാതയാണ്. വാഹനങ്ങള്‍ പോവുന്ന വഴി വേറേയുണ്ടു. തോട്ടം ഒന്നു നടന്നുകാണാന്‍ ഇറങ്ങിയപ്പോള്‍ എടുത്ത ചിത്രം ആണ് ഇതു.

ഇതാണ് ചാലക്കുടിപ്പുഴയില്‍ ഞാന്‍‌ നേരത്തെ പറഞ്ഞ കടത്ത്‌. ഇതുന് മറുകരയില്‍ ഒരു 250 മീറ്റര്‍‌ കഴിഞ്ഞാല്‍ നാം ചാലക്കുടിയില്‍ നിന്നും അതിരപ്പിള്ളിയിലേക്കുള്ള റോഡില്‍ എത്തും. അവിടെനിന്നും ഒരു പത്തു കിലോമീറ്റര്‍‌ ദൂരം കാണും അതിരപ്പിള്ളിക്കു.

വെള്ളച്ചാട്ടവും കഴിഞ്ഞു ശാന്തമായി ഒഴുകുന്ന ചലക്കുടിപ്പുഴ. മഴക്കാലത്ത്‌ എടുത്തചിത്രം ആണിത്‌. ഇത്തവണ ശകതിയായിപെയ്ത മഴയില്‍ ചാലക്കുടിപ്പുഴയും ശെരിക്കും കരകവിഞ്ഞൊഴുകി. പലര്‍ക്കും ചാലക്കുടിപ്പുഴയില്‍ ഇത്രയും വെള്ളം ഉയരുന്നതു ഓര്‍‌മ്മയില്‍ ആദ്യത്തെ അനുഭവം ആയിരുന്നു. ഞങ്ങള്‍ പോയ ആ ദിവസവും നല്ലമഴക്കോളുണ്ടായിരുന്നു.

ഈ വഴി ഒരു കാല്‍‌കിലോമീറ്റര്‍ മതി മെയിന്‍‌റോഡില്‍ എത്താന്‍. ഇവിടെയും പ്ലാന്റേഷന്‍‌ കോര്‍‌പ്പറേഷന്റെ തോട്ടമാണ്.

ഇവിടെയാണ് നമ്മുടെവഴി ചാലക്കുടിയില്‍‌നിന്നും വരുന്ന റോഡുമായി സന്ധിക്കുന്നത്‌. എറണാകുളത്തേക്കും മറ്റു പ്രധാന സ്ഥലങ്ങളിലേക്കും ഉള്ള ദൂരം സൂചിപ്പിക്കുന്ന ഫലകം.

ടൂറിസ്റ്റ് കൌണ്ടറില്‍ നിന്നും കൂപ്പണ്‍ വാങ്ങി അല്പാദൂരംകൂടി മുന്നോട്ടുവന്നാല്‍ ഈ ഇറക്കം കാണാം. ഇതു നേരെ എത്തുന്നതു വെള്ളച്ചാട്ടത്തിന്റെ അടിഭാഗത്താണ്. ഇവിടെ നിന്നും ആദ്യം വെള്ളച്ചാട്ടത്തിന്റെ ഭംഗി ആസ്വദിക്കാം. എന്നിട്ടാവം മുകളില്‍ പോവുന്നതു.

ഇതാണ് ദൈവത്തിന്റെ സ്വന്തം നാട്ടിലെ വെള്ളച്ചാട്ടം. ഇതു കടുത്ത വേനലില്‍ എടുത്ത ചിത്രം ആണ്. മെയ്‌ ഒന്നാം‌തീയതി. എന്നിട്ടും വറ്റാതെ മനോഹരമായിത്തന്നെ അതിരപ്പിള്ളി നില്‍ക്കുന്നു. സത്യത്തില്‍ ഇപ്പൊളാണ് ഏറ്റവും സുരക്ഷിതമായ സമയം.

മനോഹരമായ ഈ വെള്ളച്ചാട്ടത്തിന്റെ ചില ചിത്രങ്ങള്‍ കാണാം.

ഈ ദൃശ്യങ്ങള്‍ എത്രകാലം ഇങ്ങനെ നില്‍ക്കും എന്നറിയില്ല. കേരള സംസ്ഥാന വൈദ്യുത ബോര്‍‌ഡിനു അതിരപ്പിള്ളിയില്‍ ഒരു ജലവൈദ്യുത പദ്ധതി തുടങ്ങാന്‍ പരുപാടിയുണ്ട്‌. അതു യാഥാര്‍ഥ്യമാവുന്നതോടെ ഈ വെള്ളച്ചാട്ടം ഇല്ലാതാവുമോ എന്ന ഭയം പകൃതിസ്‌നേഹികള്‍ ഉയര്‍‌ത്തുന്നുണ്ട്‌.

വെള്ളച്ചാട്ടത്തിനു ശേഷം ശാന്തമായി ഒഴുകുന്ന പുഴ. ഈ പുഴയില്‍‌ത്തന്നെയാണ്‌ നമ്മള്‍‌ നേരത്തെകണ്ട കടത്തും.

ഇനിതിരിച്ചു മുകളിലേക്കു കയറനുള്ളതാണ്. അതുകൊണ്ട്‌ അല്പം ഭക്ഷണം ആവാം. ഇതു ഞങ്ങളുടെ പ്രിയപ്പെട്ട ഹരിയേട്ടനും സിന്ധുചേച്ചിയും വീട്ടില്‍ നിന്നും ഉണ്ടാക്കികൊണ്ടുവന്നതാണ്‌. അതിരപ്പിള്ളിക്കു വരുമ്പോള്‍ ഭക്ഷണം കൂടെകരുതുന്നതാണ് നല്ലതു.

മുകളിലേക്കു കയറുന്നതിനു മുന്‍പ് അതിരപ്പിള്ളിയുടെ ചില ചിത്രങ്ങള്‍ കൂടി. ഇവിടെ എത്രനേരം ഇരുന്നലും മതിവരില്ല. എന്നാലും മുകളില്‍ കയറി വെള്ളത്തില്‍ വിശാലമായി ഒന്നു കുളിച്ചാലല്ലെ യാത്ര പൂര്‍‌ണ്ണമാവൂ.

സത്യം പറഞ്ഞാല്‍ ആ വെള്ളം വീഴുന്നതിന്റെ അടുത്തുവരെ പോകണം എന്നുണ്ടായിരുന്നു. പക്ഷെ ഇവിടെ ഉള്ളവര്‍ സമ്മതിക്കില്ല. എന്തിനാ വെറുതെ ഭാഗ്യം പരീക്ഷിക്കണെ? ഇതാ അവരുടെ ചോദ്യം.

ഒന്നു ചിരിക്കൂ. ഒകെ താങ്ക്സ്. (വെറുതെ ആ വെള്ളച്ചാട്ടത്തിന്റെ ഭംഗി കളഞ്ഞു)
നേരത്തെ കണ്ട ചിത്രങ്ങള്‍ എല്ലാം വേനലില്‍ വറ്റിവരണ്ട അതിരപ്പിള്ളിയുടെതാ‍ണെങ്കില്‍ ഇത വര്‍ഷക്കാലത്തു വിരാട രൂപം പൂണ്ട അതിരപ്പിള്ളി. ജൂലയ്‌ മാസത്തില്‍‌ മുകളില്‍ വ്യു പോയിന്റില്‍ നിന്നെടുത്ത ചിത്രം.
നേരത്തെ ചിത്രങ്ങളില്‍ കണ്ട വെള്ളച്ചാട്ടത്തിന്റെ കീഴ്‌ഭാഗം തന്നെയാണിതു. ഇന്നു അവിടെ എത്താന്‍ സാധ്യമല്ല. അത്രയും ശക്തമായിട്ടാണ് വെള്ളം താഴെക്കു വീഴുന്നത്‌.
തിരികെ ശാന്തതയുടെ ചിത്രങ്ങളിലേക്കു. നമ്മള്‍ ഇപ്പോള്‍ വെള്ളച്ചാട്ടത്തിന്റെ മുകളില്‍ ആണ്. ഇവിടെ വിശാലമായി ഒന്നുകുളിക്കാം. നല്ല ഒഴുക്കുണ്ടു. കൂടതെ പാറക്കെട്ടുകള്‍ക്കിടക്കുള്ള കുഴികളും.
ഹലോ.... മാഷെ ഞങ്ങളും ഇവിടുത്തുകാരാണെ. ഞങ്ങളുടെ പടവും പിടിക്കാം. പിന്നെ ദാ ഇങ്ങനെ വല്ലതും ഉണ്ടെങ്കില്‍ സന്തോഷം.
ഇത്തരം കുത്തുകളില്‍ അപകടവും പതിയിരിക്കുന്നു. ചില പാറക്കെട്ടുകള്‍ക്കു സമീപം നല്ല താഴ്ചയുള്ള കുഴികളും ഉണ്ട്‌. എന്നാലും വിശാലമായി ഒരു രണ്ടര മണിക്കൂര്‍ വെള്ളത്തില്‍ കിടന്നു.
ഇത്ര കണ്ടാലും മതിവരാത്ത പകൃതിദൃശ്യങ്ങള്‍.
വെള്ളച്ചാട്ടത്തിന്റെ മുകളില്‍ നിന്നുള്ള ദൃശ്യം.
ഈ രണ്ടു ചിത്രങ്ങളും വേനലില്‍ അതിരപ്പിള്ളിയുടെ മുഖം വ്യക്തമാക്കുന്നു. ഇനി നമുക്കു വര്‍‌ഷത്തില്‍ നിറഞ്ഞൊഴുകുന്ന അതിരപ്പിള്ളി കാണാം.
ഇതു വര്‍ഷക്കാലത്തു നിറഞ്ഞു രൌദ്രഭാവത്തില്‍ ഒഴുകുന്ന അതിരപ്പിള്ളി.
താഴെ എത്രദൂരേക്കാണു ജലകണങ്ങള്‍ മേഘങ്ങളെപ്പോലെ നീങ്ങുന്നത്‌.
ഇരുട്ടുപരക്കാന്‍‌തുടങ്ങിയിരിക്കുന്നു. ഈ യാത്രയും ഇവിടെ അവസാനിക്കുകയാണ്. ഇനി എത്രയും വേഗം വീടെത്തണം. ഞങ്ങള്‍ അതിരപ്പിള്ളിയോടു തത്ക്കാലം വിടപറഞ്ഞു.
വീണ്ടും ഒരു അസ്തമനം. ഒരിക്കലും നിറം‌മങ്ങാത്ത ഒരു പിടിഓര്‍മ്മകളോടെ ഞങ്ങളും വണ്ടിയിലേക്കു നീങ്ങി. മനസ്സില്‍ ഒരു പ്രാര്‍‌ത്ഥനമാത്രം വീണ്ടും ഇവിടെവരുമ്പോള്‍ പ്രകൃതി കനിഞ്ഞുനല്‍‌കിയ ഈ സൌന്ദര്യത്തോടെ അതിരപ്പിള്ളി എന്നും ഉണ്ടാവണമേ എന്നു.

കൊച്ചികായലും ഫോര്‍‌ട്ടുകൊച്ചി കടല്‍‌ത്തീരവും

2008-05-25T16:00:00.002+05:30

കൊച്ചികായലിന്റേയും ഫോര്‍‌ട്ടുകൊച്ചി കടല്‍‌ത്തീരത്തിന്റേയും ചില ചിത്രങ്ങള്‍ ആണ്‌ ഈ ബ്ലോഗില്‍‌. കേരളത്തിന്റെ വ്യവസായികതലസ്ഥാനം എന്നും വാണിജ്യ തലസ്ഥാനം എന്നും അറിയപ്പെടുന്ന നഗരമാണ് എറണാകുളം. എറണാകുളം നഗരത്തില്‍ സംസ്ഥാന ജലഗതാഗത വകുപ്പിന്റെ ബോട്ട്‌ജെട്ടിയില്‍‌ നിന്നും ഈ യത്ര തുടങ്ങാം. ഞാന്‍‌ ഈ ബ്ലോഗില്‍ ചേര്‍ക്കുന്ന പലചിത്രങ്ങളും ഏതാനും മാസങ്ങള്‍ക്കുമുന്പേ എടുത്തതാണ്. ഇന്നു ഈ ബോട്ടുജെട്ടിയുടെ മുഖം മാറിയിരിക്കുന്നു. ഇപ്പോള്‍‌ ഇവിടെ പുതിയ ബോട്ടുജെട്ടി ഉണ്ടു. അതിന്റെ ഉത്ഘാടനം കഴിഞ്ഞോ എന്നറിയില്ല. എന്തായലും നമ്മുടെ യാത്ര തുടങ്ങാം.

ഇതു എറണാകുളത്തെ താത്കാലിക ബോട്ടുജെട്ടി. താത്കാലീകമായി ഇവിടെ പ്രവര്‍‌ത്തിക്കാന്‍ തുടങ്ങിയിട്ടു വര്‍ഷങ്ങള്‍‌ കുറച്ചായി. സര്‍‌ക്കാരുകാര്യമല്ലെ അതു അങ്ങു മുറപോലെ നടക്കും. ഇവിടെനിന്നാണു യാത്ര ആരംഭ്ക്കുന്നതു.

ഇവിടെനിന്നും നോക്കിയാല്‍ അകലെ ഈ കണുന്നതു ഫാക്ട്‌ (ഫെര്‍ട്ടിലൈസേഴ്സ് ആന്റ്‌ കെമിക്കത്സ്‌ ട്രാവങ്കൂര്‍‌ ലിമിറ്റഡ്) എന്ന കേന്ദ്ര പൊതുമേഖലാസ്ഥാപനത്തിന്നവശ്യമായ ഗന്ധകം (സള്‍‌ഫര്‍) ഇറക്കുന്ന സ്ഥലം ആണ്. കപ്പലില്‍ ഇവിടെ എത്തിക്കുന്ന ഗന്ധകം കണ്‍വെയര്‍ ബെല്‍‌ട്ട് വഴിയാണു ഇറക്കുന്നതു.

ഇതാണ് നമ്മുടെ ബോട്ടിന്റെ ഉള്‍‌ഭാഗം. ഇതു ഒരു പുതിയ ബോട്ടാണ്. അതാണ് ഇത്രയും ഭംഗി. പഴയബോട്ടുകള്‍ ആകെ മൂട്ടയുള്ള പഴയ മട്ടിലുള്ള ഇരിപ്പിടങ്ങളും ആണ്. എന്തായലും ഇത്തരം പുതിയ ഒരു ബോട്ടിന്റെ ചിത്രം കിട്ടിയതു ഭാഗ്യം ആയി. ഇതില്‍ ഞാന്‍‌ കണ്ട മറ്റൊരു പ്രത്യേകത അത്യാവശ്യത്തിനു രക്ഷാഉപകരണങ്ങള്‍ ഇതില്‍ ഉണ്ട്‌ എന്നതാണു. ഒരു നൂറുപേര്‍ക്കു കയറാവുന്ന ഈ ബോട്ടില്‍ അത്യാവശ്യം ഇരുപതുപേര്‍‌ക്കെങ്കിലും വേണ്ട “ലൈഫ് ബോയ്” കള്‍ ഉണ്ട്‌. ടൈറ്റാനിക്കില്‍ പോലും ഉണ്ടായില്ല ഇത്രയും നല്ല ഒരു അനുപാതം.

നമ്മള്‍ എറണാകുളം നഗരം വിടുകയാണ്. മറൈന്‍‌ഡ്രൈവില്‍ ഉള്ള ചില കെട്ടിടങ്ങളാണ് ഇതു. കുട്ടികളുടെ പാര്‍‌ക്കിനോടുചേര്‍ന്നു നിര്‍മ്മിച്ചിട്ടുള്ള ഒരു പാലവും ചിത്രത്തില്‍‌കാണാം. താജ്‌മലബാര്‍‌ ഹോട്ടല്‍, അതിനടുത്തുള്ള ചില കെട്ടിടങ്ങളും ചിത്രത്തില്‍ ഉണ്ട്‌.

കൊച്ചിതുറമുഖത്തിന്റെ ഒരു വിദൂരദൃശ്യം.

ഈ കപ്പല്‍ എന്താണ്‌ ചെയ്യുന്നതെന്നറിയാമൊ? കൊച്ചി എണ്ണശുദ്ധീകരണശാലക്കാവശ്യമായ അസംസ്കൃത എണ്ണ പമ്പ്‌ ചെയ്യുകയാണ്. കൊച്ചി നഗരത്തിന്റെ അടിയില്‍ ഇത്തരം എണ്ണക്കുഴലുകള്‍ ധാരളം ഉണ്ടു. ഒരിക്കല്‍ പറയുന്നതുകേട്ടു അവയില്‍ പലതും കലപ്പഴക്കം കൊണ്ടു ദ്രവിച്ചു തുടങ്ങിയതാണെന്നു. ഇത്തരം കുഴലുകളെപ്പറ്റി പ്രധാന ചര്‍‌ച്ച നടന്നതു ലത്തൂരില്‍ ഉണ്ടായ ഭൂമികുലുക്കത്തെ തുടര്‍‌ന്നാണ്. അതിന്റെ പകുതി തീവ്രതയുള്ള ഒരു കുലുക്കം മതിയത്രെ എറണാകുളം ഒരു അഗ്നിഗോളം ആകാന്‍‌.
നേരത്തെകണ്ട കപ്പലിന്റെ കുറച്ചുകൂടെ അടുത്തുനിന്നുള്ള ഒരു ദൃശ്യം. ഇത്തരം കപ്പലുകളും വളരെ അപൂര്‍‌വ്വമായി കായലില്‍ അപകടങ്ങള്‍ക്കു കാരണം ആയിട്ടുണ്ട്‌. കപ്പല്‍ എണ്ണ പമ്പുചെയ്‌തതിനു ശേഷം കടലിലൂടെയുള്ള യാത്ര സുരക്ഷിതമാക്കുന്നതിനു അവയുടെ ടാങ്കുകളില്‍ വെള്ളം നിറക്കാറുണ്ട്‌. ഇങ്ങനെ നിറക്കുന്ന വെള്ളം തുറമുഖത്തുനിന്നും എണ്ണ നിറക്കുന്നതിനായി വരുന്ന കപ്പലുകള്‍ പുറംകടലില്‍ വെച്ചു പമ്പ്‌ചെയ്തുകളയണം എന്നണു നിയമം. എന്നാല്‍ ചിലപ്പോള്‍ ഇതു തുറമുഖത്തു പ്രവേശിച്ചതിനു ശേഷം ആവും ചെയ്യുക. ഇങ്ങനെ പുറന്തള്ളുന്ന വെള്ളത്തില്‍ അല്പം അസംസ്കൃത‌എണ്ണയും കാണും. ഇതു ഒരു പാടപോലെ കായലിലെ വെള്ളത്തില്‍ പൊങ്ങിക്കിടക്കും. ഒരു ചെറിയ തീ - കായലിലൂടെ പോവുന്ന വള്ളക്കാരോ, ബോട്ടുയാ‍ത്രക്കാരോ വലിച്ചെറിയുന്ന തീപ്പെട്ടിയോ ബീഡിക്കുറ്റിയോ - മതി അതു കത്താന്‍. എന്റെ ഓര്‍മ്മയില്‍ ഒരിക്കല്‍‌ അങ്ങനെ കായലിനു തീപിടിച്ചുണ്ടായ അപകടത്തില്‍ ഈ പമ്പ്‌ഹൌസില്‍ ജോലിയിലുണ്ടായിരുന്ന രണ്ടുപേര്‍ മരിച്ചിട്ടുണ്ടു. പമ്പുചെയ്യുന്നതിനിടയില്‍ ലീക്കുചെയ്യുന്ന എണ്ണയും അപകടകാരണമാവാം. അന്നു ഇവിടെ കപ്പലുകള്‍ ഒന്നും ഇല്ലാതിരുന്നതിനാല്‍ ഒരു വലിയ ദുരന്തം ഒഴിവായി. എന്നാല്‍ ഇത്തരം കപ്പലുകള്‍ ഇപ്പോള്‍ കൊച്ചിയില്‍ വരുന്നതു കുറയും. കാരണം വൈപ്പിന്‍‌കരയിലെ പുതുവൈപ്പില്‍ നിന്നു കടല്‍ത്തീരത്തിനു എകദേശം പന്ത്രണ്ടു കിലോമീറ്റര്‍ അകലെ പുറംകടലില്‍ എണ്ണശുദ്ധീകരണശാലയുടെ എസ്. പി. എം (Single Point Mooring) പദ്ധതി പ്രവര്‍‌ത്തന സജ്ജമാണ്. കൊച്ചിതുറമുഖത്തു അടുക്കാ‍ന്‍‌ കഴിയാതിരുന്ന വലിയ എണ്ണക്കപ്പലുകള്‍ക്കു (Very Large Crude Carriers (VLCC)) പുറംകടലില്‍ നിന്നുതന്നെ നേരിട്ടു കൊച്ചി എണ്ണശുദ്ധീകരണശാലയിലേക്കു എണ്ണ പമ്പുചെയ്യന്‍ കഴിയും.
കൊച്ചികായലിലൂടെ യാത്രചെയ്യുന്ന ഏതൊരാളും ഇത്തരം കപ്പലുകള്‍ കണ്ടിരിക്കും. കപ്പല്‍ചാലിന്റെ ആഴം കൂട്ടുന്ന ഡ്രെഡ്‌ജിങ് വെസ്സല്‍‌ ആണ് ഇതു. എക്കലും ചെളിയും അടിഞ്ഞു കപ്പല്‍ചാലിന്റെ (Shipping channel) ആഴം കുറഞ്ഞുകൊണ്ടിരിക്കും. എങ്ങനെ അടിഞ്ഞുകൂടുന്ന അഴുക്കെല്ലാം മാറ്റി കപ്പല്‍ചാലിന്റെ ആഴം കൃത്യമായി നിലനിറുത്തുകയാണ് ഇതിന്റെ ജോലി. കൊച്ചി തുറമുഖ ട്രസ്റ്റ് ഇതിനായി വര്‍‌ഷം‌തോറും മുപ്പതുകോടിയിലധികം രൂപ ചിലവാക്കുന്നുണ്ടെന്നാണു കേള്‍കുന്നതു. ഇതിനായി തുറമുഖട്രസ്റ്റിനു സ്വന്തമായി നെഹ്രുശതാബ്ദി എന്ന ഒരു കപ്പല്‍ ഉണ്ടു. എന്നാല്‍ ഇതു മിക്കവാറും ഡ്രെഡ്‌ജിങ് കോര്‍പ്പാറേഷന്‍‌ ഓഫ് ഇന്ത്യ എന്ന സ്ഥാപനമോ, കമല്‍ ഡ്രെഡ്‌ജിങ് കോര്‍പ്പറേഷന്‍‌ എന്ന സ്ഥാപനമോ കരാര്‍ അടിസ്ഥാനത്തില്‍ എല്ലാവര്‍‌ഷവും ചെയ്തു വരുന്നു. കൊച്ചിയിലെ കപ്പല്‍ചാലിന്റെ ഇപ്പോഴത്തെ ആഴം പന്ത്രണ്ടു മീറ്റര്‍ ആണത്രെ.
ഇതു കപ്പലുകളെ തുറമുഖത്തു അടുപ്പിക്കുന്ന ടഗ്ഗുകള്‍ ആണു. പുറംകടലില്‍ നിന്നും കപ്പലുകളെ അതിന്റെ നിശ്ചിത ബര്‍ത്തില്‍ എത്തിക്കുന്നതും ശെരിയായി അടുപ്പിക്കുന്നതും ഇവയുടെ ജോലിയാണു. ഇതിനു പുറമെ കായലില്‍ തീപിടുത്തം ഉണ്ടായാല്‍ ആദ്യം ആശ്രയിക്കുന്ന അഗ്നിശമന ഉപാധിയും ഈ ടഗ്ഗുകളില്‍ ചിലതുതന്നെ. കാ‍യല്പരപ്പില്‍ ഒഴുകുന്ന എണ്ണപ്പാടകണ്ടാല്‍ വെള്ളം പമ്പുചെയ്തു അതിനെ നേര്‍പ്പിച്ചു അപകടസാധ്യത കുറക്കുന്നതിനും ടഗ്ഗ് ഉപയോഗിക്കുന്നു.
ഇതു വില്ലിങ്‌ടണ്‍ ഐലന്റില്‍ വിനോദസഞ്ചാരികള്‍ക്കായുള്ള ബോട്ട്‌ജെട്ടിയാണ്. കൊച്ചിതുറമുഖ ട്രസ്റ്റിന്റെ ഓഫീസും, തുറമുഖവും സ്ഥിതിചെയ്യുന്നതു ഈ ദ്വീപില്‍ ആണു. മദ്രാസ് ഗവര്‍‌ണ്ണര്‍ ആയിരുന്ന്ന ലോര്‍ഡ് വില്ലിങ്ടണും (Lord Willingdon), ബ്രിട്ടീഷ് എഞ്ചിനീയര്‍ ആയ റോബര്‍‌ട്ട് ബ്രിസ്‌റ്റോയും (Robert Bristow) ആണ്. ഈ തുറമുഖത്തിന്റെ ശില്പികളില്‍ പ്രധാനികള്‍. അതുകൊണ്ടുതന്നെ ഈ ദ്വീപ് ഇപ്പോഴും അദ്ദേഹത്തിന്റെ നാമധേയത്തില്‍ അറിയപ്പെടുന്നു.
ഇതു സാധരണ ജനങ്ങള്‍‌ക്കായുള്ള ബോട്ട്‌ജെട്ടിയാണു. സംസ്ഥാന ജലഗതാഗതവകുപ്പിന്റെ എറണാകുളം - ഐലന്റ് - വൈപ്പിന്‍ ബോട്ടുകള്‍ ഇവിടെ അടുക്കുന്നു.
ഉന്നത തുറമുഖ ഉദ്യോഗസ്ഥന്റെ ഔദ്യോഗികവസതിയുടെ മുന്‍പില്‍ ഉള്ള ബോട്ടുജെട്ടിയാണ് ഇതു.
കൊച്ചിതുറമുഖ ട്രസ്റ്റിന്റെ പുതിയ ഓഫീസ് കെട്ടിടം. കേരള ക്ഷേത്ര മാതൃകയില്‍ ആണ് ഇതിന്റെ ഏറ്റവും മുകള്‍ ഭാഗം.
തുറമുഖട്രസ്റ്റിന്റെ പഴയ ഓഫീസ്‌കെട്ടിടം. ഇതിനോടുചേര്‍‌ന്നുതന്നെയാണ് പുതിയ കെട്ടിടവും പണിതിരിക്കുന്നത്‌.
ഇതു മലബാര്‍‌ഹോട്ടല്‍. കൊച്ചിയിലെ ആദ്യത്തെ പഞ്ചനക്ഷത്ര പദവിയുള്ള ഹോട്ടല്‍ ഇതുതന്നെ ആവണം. പ്രധാനമന്ത്രിമാര്‍ക്കും, രാഷ്ട്രപതിമാര്‍ക്കും മാത്രമല്ല ഒട്ടനവധി വിദേശരാഷ്ട്രത്തലവന്മാര്‍ക്കും പ്രതിനിധികള്‍ക്കും ആഥിത്യം അരുളിയിട്ടുണ്ടു ഈ കെട്ടിടം. ഇതും നേരത്തെ കണ്ട തുറമുഖട്രസ്റ്റ് ഓഫീസിനു സമീപം തന്നെയാണ്.
ഇതു ഐലന്റിനു എതിര്‍വശത്തായി സ്ഥിതിചെയ്യുന്ന മട്ടാഞ്ചേരി. ഇവിടെ അടുപ്പിച്ചിരിക്കുന്ന മത്സ്യബന്ധനവള്ളങ്ങള്‍ ആണ് ചിത്രത്തില്‍. മട്ടാഞ്ചേരിയെപ്പറ്റി ഒത്തിരി പറയാനുണ്ടു. പല സംസ്കാരങ്ങളുടെ സംഗമഭൂമിയാണു മട്ടാഞ്ചേരി. ജൂതന്മാരും, മറാഠികളും, സിക്കുകാരും എന്നുവേണ്ട ഒട്ടനവധി ജനവിഭാഗങ്ങള്‍ ഉണ്ടിവിടെ. അത് മറ്റൊരു ബ്ലോഗില്‍ പിന്നീടു പറയാന്‍ ശ്രമിക്കാം.
കൊച്ചികായലിലൂടെ യാത്രചെയ്തു വൈപ്പിനിലും അവിടെ നിന്നു ജംങ്കാറില്‍ ഇപ്പോള്‍ ഫോര്‍ട്ടുകൊച്ചിയിലും എത്തുകയാണ് നമ്മള്‍.
വൈപ്പിനില്‍‌നിന്നും ഫോര്‍ട്ടുകൊച്ചിയില്‍ എത്താനുള്ള ഒരു മാര്‍‌ഗ്ഗം ഈ ജംങ്കാര്‍‌സര്‍വ്വീസാ‍ണ്. നേരത്തെ എറണാകുളത്തേയ്ക്കും ജംങ്കാര്‍ ഉണ്ടായിരുന്നു. എന്നല്‍ ഇന്നു ഗോശ്രീ പാ‍ലങ്ങള്‍ വന്നതോടെ അതു നിലച്ചു.
ജംങ്കാറില്‍ നിന്നിറങ്ങിയാല്‍ നേരെ കടല്‍ത്തീരത്തേയ്ക്കു നടക്കാം. കൊച്ചി അഴിമുഖത്തിന്റെ ഭംഗി ആസ്വദിച്ചു നടക്കാനുള്ള പാതയുടെ ഓരങ്ങളിലായി പല സ്മാരകങ്ങളും ഉണ്ടു. അതില്‍ ഒന്നാണു ചിത്രത്തില്‍ കാണുന്നതു. ഇതെന്താണെന്നു ഊഹിക്കാന്‍‌ സാധിക്കുന്നുണ്ടോ. കൊച്ചി ഡ്രൈഡോക്കില്‍ 1956 മുതല്‍ ഇരുപതുവര്‍ഷക്കാലം ഉപയോഗിച്ചിരുന്ന ക്രെയിനുകള്‍ പ്രവര്‍ത്തിപ്പിച്ചിരുന്ന ബോയ്‌ലറുകള്‍ ആണിത്‌. കല്‍ക്കരിയും, വിറകും അയിരുന്നു ഇതിന്റെ ഇന്ധനങ്ങള്‍.
ഈ ശിലാഫലകത്തില്‍ എന്താണ് എഴിതിയിട്ടുള്ളതെന്നു എനിക്കും അറിയില്ല. പോര്‍ട്ടുഗീസ് ഭാഷയണെന്നണു തോന്നുന്നത്‌. ഇതറിയാവുന്ന ആരെങ്കിലും ഒന്നു പരിഭാഷപ്പെടുത്തിയാല്‍ ഉപകാരം. (എന്റെ ഊഹം 1992 ജനുവരി 29-നു പോര്‍ട്ടുഗീസ് പ്രസിഡന്റായ ഡോക്ടര്‍ മാ‍രിയോ സോറസിന്റെ സന്ദര്‍‌ശനത്തിന്റെ സ്മാരകം ആണെന്നാണു)
ഇതാണ് ഞാന്‍ നേരത്തെ പറഞ്ഞ നടപ്പാത. കടലിന്റേയും അഴിമുഖത്തിന്റേയും ഭംഗി ആസ്വദിച്ചുകൊണ്ടു ഇതിലെ നടക്കാം.
ഫോര്‍ട്ടുകൊച്ചി കടല്‍‌ത്തീരത്തുള്ള പഴയ രീതിയിലുള്ള ഒരു കെട്ടിടം.
ഇതു ഫോര്‍ട്ടുകൊച്ചിബീച്ച്‌. ഒരു കാലത്തു ധാരാളം വിനോദസഞ്ചാരികള്‍ വന്നിരുന്ന ഈ കടലോരം ഇന്നു വളരെ വിജനമാണ്. ഒരു പക്ഷെ പരിസരമലിനീകരണം മൂലം വൃത്തിഹീനമായതാവം കാരണം. ഡ്രെഡ്‌ജ് ചെയുന്ന ചെളിയും, ആഫ്രിക്കന്‍‌പായലും അടിഞ്ഞുകൂടി ആകെ വൃത്തിഹീനമായിരിക്കുന്നു ഇവിടം.
ഇതാ കടലോരത്തിന്റെ മറ്റൊരു ദൃശ്യം. എങ്ങനെ ആണു ഇവിടെ കുളിക്കാന്‍ സാധിക്കുക. ഒരുകാലത്തു വളരെ വിശാലമായ കടല്‍‌ത്തീരം ഉണ്ടായിരുന്ന ഇന്നിവിടെ നമമാത്രമായ ഒരു ബീച്ച്‌ ആണുള്ളതു. അതും താമസിയാതെ ഇല്ലാതായേക്കാം.
ഇതു വിനോദസഞ്ചാരവകുപ്പിന്റെ ആഭിമുഖ്യത്തില്‍ സ്ഥാപിച്ച ലഘുഭക്ഷണശാലകള്‍ ആണു. ഞാന്‍ പോവുമ്പോള്‍ ഇതില്‍ ഒന്നുപോലും തുറന്നതായി കണ്ടില്ല. അന്നുമാത്രമല്ല അടുത്തകാ‍ലത്തൊന്നും ഇവ തുറന്നു പ്രവര്‍ത്തിച്ച്തിന്റെ ഒരു ലക്ഷ്ണവും കണ്ടില്ല.
പഴയകൊച്ചികോട്ടയായ “ഫോര്‍‌ട്ട്‌ ഇമ്മാനുവല്‍” ന്റെ ഭാഗമായിരുന്നു ഈ പീരങ്കി. ഈ കോട്ട ഇന്നില്ല. അതു കടലെടുത്തുപോയി എന്നാണു അറിയുന്നത്‌.
ആദ്യം നമ്മള്‍ പറഞ്ഞ നടപ്പാതക്കു അല്പം ദൂരെയായി വിനോദസഞ്ചാരികള്‍ക്കു വിശ്രമിക്കുവാനുള്ള സ്ഥലം ആണ് ചിത്രത്തില്‍. ഇത്തരത്തില്‍‌ഉള്ള കുറച്ചു കേന്ദ്രങ്ങള്‍ ഇവിടെ ഉണ്ട്‌.
കക്കയുടേയും മറ്റും പുറന്തോടുകള്‍ കൊണ്ടു വിവിധ കരകൌശലവസ്തുക്കള്‍ ഉണ്ടാ‍ക്കി വിപണനം ചെയ്യുന്നവരാണ് ഇതു. കീചെയില്‍ മുതല്‍ പലതരം സാധനങ്ങള്‍ ഇവിടെക്കാണാം.
ഇതാപഴയമാതൃകയിലുള്ള ഒരു കെട്ടിടം. ഒരുകാലത്തു ഇതു ഡെപ്യൂട്ടി കളക്ടറുടെ ഔദ്യോഗീക വസതിയായിരുന്നു എന്നുതോന്നുന്നു. ഇപ്പോള്‍ ഇതു പുരാവസ്തുവകുപ്പിന്റെ കീഴില്‍ ഒരു സംരക്ഷിത സ്മാരകം ആണ്.
ചരിത്രപരമായി വളരെ പ്രാധന്യമുള്ള ഒരു കൃസ്തീയദേവാലയം ആണിത്‌. കേരളത്തിലേത്തന്നെ ഏറ്റവും പഴക്കം ചെന്ന പള്ളികളില്‍ ഒന്നാണ്. ഇതിന്റെ കൂടുതല്‍ വിവരങ്ങള്‍ ഞാന്‍ മറന്നു. ക്ഷമിക്കുക. പിന്നീടു അതു ചേര്‍ക്കാന്‍ ശ്രമിക്കാം.
ഇതു ഫോര്‍ട്ടുകൊച്ചിവെളി. ഫോര്‍ട്ടുകൊച്ചിക്കാരുടെ ഏറ്റവും പ്രിയപ്പ്പെട്ട കായികവിനോദം എതാണെന്നു ചോദിച്ചാല്‍ സംശയം കൂടതെപറയാം ഫുട്‌ബോള്‍‌ എന്നു. എത്രമഴയത്തും വൈകുന്നേരങ്ങളില്‍ എവിടെ ഫുട്‌ബോള്‍ കളിക്കുന്നതുകാണാം. പിന്നെ ഫോര്‍‌ട്ടുകൊച്ചിയുടെ മറ്റു പ്രത്യേകതകള്‍ ഗട്ടാഗുസ്തി മത്സരവും, പുതുവത്സരാഘോഷത്തൊടനുബന്ധിച്ചു നടക്കുന്ന ബീച്ച് കാര്‍‌ണിവെല്ലും ആണ്. പിന്നെ ഇന്ത്യയിലെ ഒരുവിധം എല്ലാ ഉത്സവങ്ങളും ഇവിടെ ആഘോഷിക്കറുണ്ട്‌.
വിനോദസഞ്ചാരത്തിന്റെ ഭാഗമായി കായല്‍‌യാത്രക്കുള്ള സൌകര്യവും ഇവിടെ ഉണ്ട്‌. അതിനായി മാത്രം ഉള്ള ഒരു ബോട്ട്‌ജെട്ടിയും ഇവിടെ ഉണ്ട്‌. വിനോദസഞ്ചാരികള്‍ക്കു ആവശ്യമായ സഹായങ്ങള്‍ ചെയ്യുന്നതിനു ഒരു ടൂറിസ്റ്റ് ഇന്‍ഫോര്‍‌മേഷന്‍ സെന്ററും ഇവിടെ പ്രവര്‍ത്തിക്കുന്നു. കൂടാതെ മറ്റുസ്ഥലങ്ങളെ അപേക്ഷിച്ചു ടൂറിസം പോലീസിന്റെ സാന്നിധ്യവും ഇവിടെ കൂടുതല്‍ അണ്.
ഫോര്‍‌ട്ടുകൊച്ചിയുടെ സൌന്ദര്യത്തിനു തൊടുകുറിയാണ് ഈ ചീനവലകള്‍. കായലില്‍ അഴിമുഖം വരെ നീണ്ടുനില്‍ക്കുന്ന ധാ‍രാളം ചീനവലകള്‍ ഉണ്ടു കൊച്ചിയില്‍.
ഇതാ അത്തരം ചീനവലകളുടെ ഒരു ദൃശ്യം. മനുഷ്യന്‍ മത്സ്യബന്ധനത്തിനു ഉപയോഗിച്ച ഏറ്റവും പഴയ മാര്‍‌ഗ്ഗങ്ങളില്‍ ഒന്നാവണം ചീനവല.
ഇതു ഫോര്‍‌ട്ടുകൊച്ചി ബോട്ടുജെട്ടിയൊടു ചേര്‍‌ന്നുള്ള ഒരു ഹോട്ടല്‍ ആണ്. ബ്രണ്ടന്‍ ബോട്ട്‌യാര്‍‌ഡ്‌ ഹോട്ടല്‍. പഴയ ഒരു കെട്ടിടം ഹോട്ടല്‍ ആക്കിയതാവണം. എന്തായലും കായല്‍ക്കരയില്‍ നല്ല ഭംഗിയാണ്‌ ഇതു കാണാ‍ന്‍.
അങ്ങനെ ഫോര്‍‌ട്ടുകൊച്ചി യാത്രയുടെ വിശേഷങ്ങള്‍ ഇവിടെ തീരുന്നു. ഒരു കാ‍ലത്തു കേരളത്തിലെ പ്രധാന വിനോദസഞ്ചാരകേന്ദ്രങ്ങളില്‍ ഒന്നായിരുന്ന ഈ കടല്‍ത്തീരം ഇന്നു നമാവശേഷമായിക്കഴിഞ്ഞു. ഇവിടെ അവശേഷിക്കുന്നതു പഴമയുടെ ചില സ്മാരകങ്ങള്‍ മാത്രം. ഇവിടെ നിന്നും അധികം ദൂരെയല്ലാതെ മട്ടാഞ്ചേരിയും ഉണ്ട്‌. ജൂതന്മാരുടെ ആരധനാലയങ്ങളും, പുരാവസ്തുക്കളുടെ വലിയശേഖരങ്ങളുള്ള തെരുവുകളും ആയി. കേരളത്തിന്റെ തീരത്തു ആദ്യമായി എതിയ വസ്‌കോ-ഡ-ഗാമയുടെ ശവകുടീരവും ഇവിടെ അത്രെ. ആ ചിത്രങ്ങളും വിശേഷങ്ങളുമായി വീണ്ടും ഒരിക്കല്‍കാണാം. ഈ ബ്ലോഗു നിങ്ങളുടെ അഭിപ്രായങ്ങള്‍‌ക്കായി ഇവിടെ സമര്‍‌പ്പിക്കുന്നു.

ആലപ്പുഴ കായല്‍‌യാത്രയുടെ മനോഹാരിത

2008-05-22T10:00:00.000+05:30

ഇതു ആലപ്പുഴയെപ്പറ്റിയാണ്. കിഴക്കിന്റെ വെനീസ് എന്നറിയപ്പെടുന്ന നഗരം. ഒരുകാലത്ത്‌ കേരളത്തിലെ ഒരു പ്രധാന തുറമുഖനഗരം കൂടിയായിരുന്നു ആലപ്പുഴ. എന്നാല്‍‌ ഇന്നു ആ പ്രതാപം എല്ലാം അസ്തമിച്ചിരിക്കുന്നു. തുറമുഖം ഇന്നു നാമാവശേഷമായി. എന്നാലും കായല്‍‌യാത്രയുടെ മാധുര്യം ഇന്നും ആലപ്പുഴയുടെ പ്രത്യേകതയാണ്. അത്തരം ഒരു യാത്രയുടെ അനുഭവം ഞാന്‍‌ ഈ ചിത്രങ്ങളിലൂടെ നിങ്ങളോടു പങ്കുവക്കുന്നു. സ്വാഗതം.
യാത്ര ആരംഭിക്കുന്നതു ഇവിടെ നിന്നാണ്. ടൂറിസ്റ്റ് ഇന്‍ഫോര്‍‌മേഷന്‍‌ ആഫീസിനോടു ചേര്‍‌ന്നുള്ള ചെറിയ ചാലില്‍‌ നിന്നും. ഇവിടെ ഇതിന്റെ രണ്ടു വശത്തുമായി പലതരത്തിലുള്ള നിരവധി വള്ളങ്ങളും ബോട്ടുകളും കാണം. അതില്‍‌ ഒരെണ്ണം തിരഞ്ഞെടുത്തു ഞങ്ങളും യാത്ര തുടങ്ങി.

ഞങ്ങളുടെ യാനം കാണുന്നതിനു മുന്‍പ്‌ അവിടെയുള്ള ചില ആഢംബര വള്ളങ്ങളുടെ ചിത്രങ്ങള്‍‌ ആവട്ടെ ആദ്യം.

എത്രഭംഗിയുള്ള വള്ളങ്ങള്‍‌
ഇതെല്ലാം ഒന്നുതന്നെയാണെന്നു തോന്നുണ്ടോ. എങ്കില്‍ നിങ്ങള്‍‌ക്കു തെറ്റി. ഒന്നുകൂടി സൂക്ഷിച്ചു നോക്കൂ.
ഇതാ മറ്റൊരു വള്ളം കൂടി.
ഇതും ഒരു വി ഐ പി തന്നെ.
വിശാലമായകായലിനു‌ ഇടക്കുള്ള ഇത്തരം പച്ചത്തുരുത്തുകള്‍‌ കുട്ടനാ‍ടന്‍‌ ജലാശയങ്ങളുടെ ഒരു പ്രത്യേകതയാണു. ഇവിടെ ഇത്തരം തുരുത്തുകളില്‍‌ നിന്നും പ്രധാന കരയിലെത്താന്‍ ആളുകള്‍‌ക്കു ആശ്രയം കൊച്ചുവള്ളങ്ങള്‍‌ ആണ്. പ്രധാനകരയില്‍ താമസിക്കുന്നവര്‍ ബൈക്കും കാറും ഉണ്ടെന്നു പറയുന്നതുപോലെ വള്ളവും ബോട്ടും ഉണ്ടെന്നാ‍വും ഇവര്‍ പറയുക അല്ലെ. പുറമെ വളരെ നല്ലതെന്നു തോന്നുമെങ്കിലും അങ്ങനെ ഒരു ജീവിതം ശെരിക്കും ദുരിതം തന്നെ. വല്ല അസുഖവും വന്നാല്‍‌ പെട്ടന്ന്‌ ആശുപത്രിയില്‍‌ എത്തിക്കാന്‍‌ കഴിയത്ത അവസ്ഥ. പിന്നെ നല്ല മഴവന്നാലത്തെ കാര്യം പറയുകയേ വേണ്ട.
ദാ ആപോവുന്ന ബോട്ടുകണ്ടോ അതുപോലുള്ള ഒന്നിലായിരുന്നു ഞങ്ങളുടേയും യാത്ര.
രാവിലെ അല്പം ഭക്ഷണം കഴിക്കാം. ഭക്ഷണവും കായല്‍ യാത്രയും ഒരുമിച്ചാവുന്നതിന്റെ ഒരു രസം അതൊന്നുവേറെതന്നെയാണു. (സസ്യാഹാരികളായിട്ടുള്ളവര്‍‌ക്കു ഈ ചിത്രവും ഇനി വരാന്‍ പോവുന്ന ചില ചിത്രങ്ങളും അരോചകമായിതോന്നുന്നുവെങ്കില്‍‌ മാപ്പ്‌)
അങ്ങനെ ഭക്ഷണവും കഴിച്ചു തലയുയര്‍‌ത്തിനോക്കുമ്പോള്‍ അതാ ... എതാണ്ടു ഇടവഴിയില്‍‌നിന്നും ദേശീയപാതയിലേക്കു കയറിയ പ്രതീതി. ചുറ്റും ഒത്തിരി വലിയ വള്ളങ്ങള്‍‌. ഞങ്ങളും ആ ഒഴുക്കിലേക്കുചേര്‍‌ന്നു.
അതുവരെ കണ്ടതില്‍‌വെച്ചേറ്റവും ആഢംബരമായ ജലയാനം ഇതു തന്നെ സംശയം ഇല്ല.
വാകമരങ്ങള്‍ ഒത്തിരികാണാറുണ്ടെങ്കിലും ഇങ്ങനെ ഒന്നു കണ്ടപ്പോള്‍ എന്തോ ഒരു പ്രത്യേകത തോന്നി.
ഞങ്ങള്‍‌ക്കു ഇതു ഒരു വിനോദയാത്രയാണെങ്കിലും ഈ അമ്മൂമ്മക്കു ഇതു ജീവിതയാത്രയുടെ ഭാഗം ആണ്. പിന്നില്‍ കാണുന്നതു ഒരു സ്കൂള്‍‌കെട്ടിടം ആണെന്നാണു ഓര്‍‌മ്മ.
അല്പം മധുരക്കള്ളും യാത്രയില്‍‌ ആവാം എന്നണു കൂട്ടുകാരുടെ അഭിപ്രായം. ഇതു മദ്യം അല്ലെന്നും ഒരു പ്രകൃതിദത്ത പാനീയം മാത്രമാണെന്നും വിശദീകരിക്കപ്പെട്ടു.
കായല്‍‌ത്തീരത്തുകണ്ട മനോഹരമാ‍യ ഒരു കൃസ്തീയ ദേവാലയം.
ചുറ്റും വെള്ളം തന്നെ. പക്ഷെ പറഞ്ഞിട്ടെന്താ മനുഷ്യനു കുടിക്കന്‍‌ ഇതു തന്നെ ആശ്രയം. കേരള ജല അതോറിട്ടിയുടെ കൈനകരിയിലെ ജലസംഭര്ണി.
ഇവിടെയാണു ഞങ്ങളുടെ ഉച്ചഭക്ഷണം ഏര്‍‌പ്പാടാക്കിയിരിക്കുന്നത്‌. കായലിനോടുചേര്‍‌ന്നുള്ള ഒരു കൊച്ചു റെസ്‌റ്റോറന്റ്‌. നേരത്തെ ഒന്നും തയ്യാറക്കിയിട്ടില്ല ഇവിടെ. നമ്മുടെ ആവശ്യം അനുസരിച്ചുള്ള ഭക്ഷണം അപ്പോള്‍‌ത്തന്നെ തയ്യാറാക്കിത്തരും എന്നതാണു പ്രത്യേകത. കുറച്ചു സമയം കാത്തിരിക്കണം എന്നു മാത്രം.
ബോട്ടടുപ്പിച്ചു ഞങ്ങളും ഇറങ്ങി. ഒരു വിധം നല്ല വിശപ്പും ഉണ്ടായിരുന്നു.
ഒരു കെട്ടുവള്ളത്തിന്റെ പ്രതീതിയായിരുന്നു ആ റസ്‌റ്റോറന്റിന്റെ ഉള്‍ഭാ‍ഗത്തിനു.
ആലപ്പുഴയാത്രയില്‍‌ ഏറ്റവും ആസ്വദിച്ചു കഴിച്ച ഭക്ഷണം ഏതെന്നുചോദിച്ചാല്‍ ഇതുതന്നെ കൊഞ്ചുഫ്രൈ.
ഭക്ഷണം കഴിഞ്ഞപ്പോള്‍ ഒരു മോഹം. അവിടെക്കണ്ട കൊച്ചുവള്ളം ഒന്നു തുഴയാന്‍‌. ചുമ്മാ. കെട്ടഴിക്കാതെ ഒന്നു തുഴഞ്ഞു നോക്കി. ഒരു പാട്ടും പടി “കടത്തുതോണിക്കാരാ.. കറുത്തതോണിക്കാരാ.... മാനമിരുണ്ടു മനസ്സുമിരുണ്ടു മറുകരയാരുകണ്ടൂ... “
ബോട്ടില്‍‌കയറി കുറച്ചുമുന്നോട്ടുചെന്നപ്പോള്‍ കണ്ട ഒരു ദൃശ്യം.
ഇതെന്താണെന്നു മനസ്സിലായോ? സൂക്ഷിച്ചു നോക്കൂ. ഒരു ചുണ്ടന്‍‌വള്ളം ആണു. നമ്മുടെ ക്യാമറയില്‍‌ ഇത്രയെ പറ്റൂ.
വൈകീട്ടത്തെ ഭക്ഷണം ഇടക്കുവാങ്ങി ബോട്ടില്‍‌വച്ചുതന്നെ കഴിചു. അതും തികച്ചൂം നാടന്‍‌ കപ്പയും ഇറച്ചിയും.
ഇതും ഇടക്കു ആലപ്പുഴയില്‍ കണ്ട കാഴ്ചതന്നെ. വെള്ളം കയറി നശിക്കുന്ന ബോട്ടുകള്‍. എസ്‌ ഡബ്ലിയു ടി ഡി യുടെതാണിവ. സഞ്ചാരയോഗ്യം അല്ലാത്തതുകൊണ്ടാവും ഉപേക്ഷിച്ചതു.
ഈ യാത്രയും തീരാന്‍ പോവുന്നു. സൂര്യന്‍ അസ്തമിക്കാറായി. എത്രയും വേഗം കരപറ്റണം. അതാ‍യി അടുത്ത ചിന്ത.
കായല്‍ ഇരുട്ടിന്റെ പിടിയില്‍ അമരുന്നു. കുങ്കുമശോഭപരത്തി സൂര്യനും മറഞ്ഞുകഴിഞ്ഞു. ഒരുപിടി നല്ല ഓര്‍‌മ്മകളുമായി ഞങ്ങളും വീടുകളിലേക്ക്‌. വീണ്ടും ഇതുപോലെ ഒത്തുചേരാന്‍ കഴിയും എന്ന ശുഭപ്രതീക്ഷയോടെ.
(18/05/2008 ചെയ്ത ഈ ബ്ലൊഗ് ഇന്ന്‌ (22/05/2008) പുതുക്കിയതാണ്)

ചെറായി മറ്റൊരു സുന്ദരതീരം.

2008-05-14T21:00:00.001+05:30

കൊച്ചി മഹാനഗരത്തില്‍ നിന്നും ഏകദേശം ഇരുപത്തിഅഞ്ചു കിലോമീറ്റര്‍‌ അകലെ സ്ഥിതിചെയ്യുന്ന മനോഹരമായ കടല്‍‌ത്തീരമാണ് ചെറായി. (എന്റെ വീട്ടില്‍‌ നിന്നും ഇവിടെക്കു അഞ്ചു കിലോമീറ്റര്‍‌ മാത്രം). ഈ മനോഹര തീരത്തിന്റെ ചില ചിത്രങ്ങള്‍‌ ചുവടെ ചേര്‍‌ക്കുന്നു. കടലും കായലും ചേര്‍ന്നുകിടക്കുന്ന ഒരു തീരം എന്ന പ്രത്യേകത കൂടിയുണ്ടു ചെറായിക്കു. 26കിലോമീറ്റര്‍‌ നീളം വരുന്ന വൈപ്പിന്‍‌കരയിലെ പ്രധാന വിനോദസഞ്ചാരകേന്ദ്രം കൂടിയാണു ചെറായി. കൊച്ചിനഗരത്തില്‍‌ നിന്നും റോഡ്‌‌മാര്‍‌ഗ്ഗം ഇവിടെ എത്തിച്ചേരാവുന്നതാണു. ചെറായിയുടെ മറ്റൊരു പ്രത്യേകത കൊച്ചി അന്താ‍രാഷ്ട്രവിമാനത്താവളത്തോട്‌‌ ഏറ്റവും അടുത്തു സ്ഥിതിചെയ്യുന്ന കടല്‍‌ത്തീരം എന്നതാണ്.

കടല്‍‌ത്തീരത്തു വരുന്ന ഏതൊരാളുടെയും മോഹമാണ് കടളിലെ വിശാലമായ കുളി. തികച്കും ശാന്തമായ കടല്‍.
ഇവിടെ എത്തുന്നവരെ ഒരിക്കലും നിരാശരാ‍ക്കാറില്ല. താ‍രതമ്യേന വൃത്തിയുള്ള കടല്‍‌ത്തീരം ചെറായിയുടെ പ്രത്യേകതയാണു. അത്ര ശക്തമല്ലാത്ത തിരകളും ഇവിടം സുരക്ഷിതമാക്കുന്നു. എന്നാലും സുനാമിയുടെ ദുരന്തം ഏറ്റുവാങ്ങേണ്ടി വന്നിട്ടുണ്ടു ഈ തീരത്തിനു.

സാധാരണ ഒഴിവുദിവസങ്ങളില്‍‌ വലിയതിരക്കാണു ഇവിടെ. സ്വദേശീയരും വിദേശീയരും ആയ ഒട്ടനവധി ആളുകള്‍‌ ഇവിടെ എത്തിച്ചേരാറുണ്ടു.
അത്തരം ഒരു സായഹ്നമാണു ചിത്രത്തില്‍‌
ഓലക്കുടകള്‍‌ക്കു കീഴില്‍‌ഇരുന്നു കടലിന്റെ സൌന്ദര്യം ആസ്വദിച്ചും പട്ടം പറത്തിയും എല്ലാം ഇവിടെ സമയം ചിലവൊഴിക്കാം.
കടലിന്റെ സൌന്ദര്യം ആസ്വദിക്കാന്‍‌ എത്തുന്നവര്‍ക്കു ചെറിയ വിഭവങ്ങള്‍‌ വില്‍‌ക്കുന്നതിനു ജില്ലാ ടൂറിസം വകുപ്പു ഉണ്ടാക്കിയ വ്യാപാരകേന്ദ്രങ്ങളില്‍‌ ഒന്നാ‍ണിത്‌. ഇങ്ങനെ നശിക്കന്‍‌ കാരണം അറിയില്ല. ഇന്നിതു ഉപയോഗശൂന്യമാണ്.
ഇതു ഒരു റിസോര്‍‌ട്ടാണ്. കടല്‍‌ത്തീരത്തും കായലോരത്തുമായി ഇത്തരം നിരവധി റിസോര്‍‌ട്ടുകള്‍‌ കാണാം.
ഇനി അല്‍പ്പം വിശ്രമം ആവാം അല്ലെ. ഇതിലും ഉന്മേഷദായകമായ വെറെ ഏതു പനീയമാണ് ഉള്ളതു. (അല്ല വേറെ എന്തെങ്കിലും വേണം എന്നുണ്ടെങ്കില്‍ അതും ലഭ്യമാണ്. എനിക്കു ഇതു മതി.)
കരിക്കുകുടിച്ചു. അല്പം വിശ്രമവും കഴിഞ്ഞു. എന്നാലും വിശപ്പുണ്ടു. എന്തെങ്കിലും കഴിക്കാം. എന്നിട്ടാവാം ബാക്കി വിവരണം. ഈ കടപ്പുറത്തു എന്തു കിട്ടാനാ? എന്ന ചോദ്യം വേണ്ട. ദാ നോക്കിക്കെ.
എല്ലാത്തരം നാടന്‍ വിഭവങ്ങളും ലഭ്യമാണു എവിടെ. മലയാളിയുടെ പ്രിയപ്പെട്ട ഭക്ഷണമായ കപ്പയും, മീനും, കരിമീനും, കൊഞ്ചും, കക്കയും, ഞണ്ടും എല്ലാം കിട്ടും. ഇതു കഴിക്കാ‍ന്‍ നക്ഷത്ര സൌകര്യങ്ങള്‍ ഉള്ള റിസോര്‍‌ട്ടുകളും ഹോം‌ലിഫൂഡ്‌ ലഭിക്കുന്ന വീടുകളും ഉണ്ടു. ഇതൊന്നും അല്ല നാടന്‍‌ ഷാപ്പിലെ ഭക്ഷണമാണു പ്രിയമെങ്കില്‍ അതും റെഡി. പിന്നെ എവിടെയായലും ചൈനീസ്‌ വിഭവങ്ങള്‍ വേണ്ടവര്‍‌ക്കു അത്തരം ഭക്ഷണവും ലഭ്യമാണ്. ഭക്ഷണം കഴിച്ചു ഇനി? കടപ്പുറത്തുകൂടെ നടക്കാന്‍‌ വയ്യ. എന്നല്‍‌ അല്പം കായല്‍‌ സവാരിയാവാം അല്ലെ.
കടലിനോടു ചേര്‍‌ന്നുള്ള കായലില്‍ ബോട്ടിങ്ങിനുള്ള സൌകര്യം ഉണ്ടു. വിശാലമായ കായലില്‍ വെയിലാറിയ ശേഷം പെഡല്‍‌ബോട്ടില്‍‌ ഒന്നും കറങ്ങാം.
കായല്‍‌ക്കരയില്‍ സ്ഥിതിചെയ്യുന്ന റിസോര്‍‌ട്ടുകളാണ് ഇതെല്ലാം. റിസോര്‍‌ട്ടുകളുടെ ഒരു ഭാഗം കടലും മറ്റേഭാഗം കായലും ആണ്.
ഇനി ചില റിസോര്‍‌ട്ടുകളുടെ ചിത്രങ്ങള്‍‌ കാണാം.
ഇതു കടല്‍‌ക്കരയിലെ മറ്റൊരു റിസോര്‍‌ട്ട്‌.
എല്ലാവര്‍‌ഷവും ഡിസം‌ബര്‍‌ 31-നു‌ പുതുവത്സരാഘോഷങ്ങളുടെ ഭാഗമായി ചെറായി കടല്‍‌‌ത്തീരത്തും കാര്‍‌ണ്ണിവെല്‍‌ നടക്കാറുണ്ടു. 2006-ല്‍‌ നടന്ന ആഘോഷങ്ങാളുടെ ഭാഗമായി നടന്ന ചെണ്ടമേളത്തിന്റെ ചിത്രം.
പുതുവത്സരാഘോഷങ്ങളുടെ ഭാഗമായി നടന്ന ഗജമേള.
കടല്‍‌ത്തിരകളില്‍‌ അലിഞ്ഞുചേരുമെങ്കിലും മണല്‍‌ ശില്പങ്ങള്‍ ഉണ്ടാക്കുന്ന തിരക്കിലാണ് ഇവര്‍‌.
തിരക്കേറിയ ഒരു സായാഹ്നം.
എത്രകണ്ടാലും മതിവരാത്ത കാഴ്ചകളാണ് കടല്‍‌ത്തീരത്തിന്റേത്‌. എന്നാലും മടങ്ങേണ്ട സമയത്തെ പലപ്പോഴും ഓര്‍‌മ്മപ്പെടുത്തുന്നത്‌ ഈ ദൃശ്യം തന്നെ. അസ്തമനം.

കണ്ണും കരളും നിരഞ്ഞ കാഴ്ചയുടെ ഓര്‍‌മ്മകളുമായി ഒരു മടക്കം.
ചെറായി കടല്‍‌ത്തീരത്തെത്താനുള്ള ഏറ്റവും വലിയ പ്രശ്നം പ്രധാന റോഡില്‍‌നിന്നും കടല്‍‌ത്തീരംവരെയുള്ള ഒന്നരകിലോമീറ്റര്‍‌ ദൈര്‍‌ഘ്യം വരുന്ന ഇടുങ്ങിയ റോഡ്‌ തന്നെയാണു. ഈ റോഡില്‍‌ ഉള്ള ഒരു മരപ്പാലം പുതുക്കിപ്പണിയും എന്ന പ്രഖ്യാപനം കടലാസ്സില്‍‌ മാത്രം ഒതുങ്ങുന്നു.
(ഇതിലെ ചില ചിത്രങ്ങള്‍‌ എന്റെ സുഹൃത്തുക്കളായ അരുണ്‍‌ സദാശിവന്‍‌, രാജേഷ്‌ ആര്‍‌ നായര്‍‌ എന്നിവര്‍‌ എടുത്തതാണ്)
(ഈ ചിത്രങ്ങള്‍‌ എല്ലാം ഒരേദിവസം എടുത്തതല്ല. ഓരോതവണ ചെറായിയില്‍‌ പോവുമ്പോഴും എടുത്ത ചിത്രങ്ങളില്‍‌ നിന്നും തിരഞ്ഞെടുത്ത ചില ചിത്രങ്ങള്‍‌ ആണ് ഇതെല്ലാം)

ചില കോവളം ചിത്രങ്ങള്‍‌ - 2

2008-05-10T22:26:00.006+05:30

കോവളം ചിത്രങ്ങളുടെ ബാക്കി ചില ചിത്രങ്ങള്‍‌ എവിടെ ചേര്‍‌ക്കുന്നു.

ഈ രംഗം കാണുമ്പോള്‍‌ ഓര്‍‌മ്മവരുന്നതു പ്രസിദ്ധമായ ഒരു മലയാളചലച്ചിത്രഗാനം ആണു
“ഞാന്‍ ഞാന്‍ ഞാനെന്ന ഭാവങ്ങളെ പ്രാകൃതയുഗമുഖ താളങ്ങളെ
തീരത്തു മത്സരിച്ചു മത്സരിച്ചു മരിക്കുമീ തിരകളും നിങ്ങളും ഒരു പോലെ”

തിരയുടെ ശക്തികൂടുമ്പോള്‍ ജനങ്ങള്‍‌ക്കു മുന്നറിയിപ്പു നല്‍‌കുന്നതിനു ലൈഫ്‌ഗാര്‍‌ഡുകള്‍ സ്ഥാപിക്കുന്ന ഫലകം.

കോവളം ജുമാ‌മസ്ജിത്

ഒത്തിരിനേരം കാത്തിരുന്നിട്ടു ഇത്രയുമെ കിട്ടിയുള്ളു. പിന്നീടു സൂ‍ര്യന്‍‌ മേഘങ്ങള്‍‌ക്കിടയില്‍ മറഞ്ഞു.

ചില കോവളം ചിത്രങ്ങള്‍‌

2008-05-10T01:31:00.003+05:30

കേരളത്തിലെ പ്രകൃതിരമണീയമായ കടലോരങ്ങളില്‍ ഒന്നാന്ണ് കോവളം. ഒരിക്കല്‍ അവിടെ പോയപ്പോള്‍ എടുത്ത ചില ചിത്ത്രങ്ങള്‍ എവിടെ ചേര്‍ക്കുന്നു.

ഇതു കോവളം ലൈറ്റ്‌ഹൌസിനു താഴെ നിന്നും എടുത്ത ചിത്രം. കോവളം ഹവ്വാബീച്ചിന്റെ (Eve's Beach) നല്ല്ലൊരുഭാഗം ഈ ചിത്രത്തില്‍ കാണാം.

കോവളം ലൈറ്റ്‌ഹൌസ്‌ ഇതിന്റെ മുകളില്‍ കയറണം എന്ന ആഗ്രഹത്തോടെയാണ് അവിടെ വരെനടന്നത്‌. എന്നാല്‍ ചിത്രങ്ങള്‍ എടുത്തു പതുക്കെ അവിടെ എത്തിയപ്പോഴേക്കും സന്ദര്‍‌ശകരെ പ്രവേശിപ്പിക്കുന്ന സമയം കഴിഞ്ഞിരുന്നു. നിരാശനായി മടങ്ങി.

വാഹനങ്ങള്‍ പാര്‍ക്കുചെയ്യുന്നതിനും കടലിലെകുളി കഴിഞ്ഞു വൃത്തീയായി കുളിക്കുന്നതിനും ഉള്ള സൌകര്യം എവിടെ ഉണ്ട്‌.

ടൂറിസ്റ്റുകള്‍ വരും പോവും നമ്മുടെ പണി നമുക്കു ചെയ്യാം. മത്സ്യബന്ധനത്തിനുള്ള തയ്യറെടൂപ്പിലാണ് ഇവര്‍‌

അമ്പട എന്നോടാ കളി അച്ഛനും അമ്മയും രണ്ടു കുട്ടികളും അടങ്ങുന്ന ഒരു സംഘത്തിലേതാണു ഈ മിടുക്കന്‍. ചേട്ടനും അച്ഛനും അമ്മയും ഒരു അന്‍പതുമീറ്റര്‍ അകലെ ആണു.

കോവളത്തു ഞാന്‍ കണ്ട ഒരു സങ്കടകരമായ കാഴ്ച. ഈ മനോഹരതീരത്തെക്കാണു സമീപത്തുള്ള ഹോട്ടലുകളിലെ മലിനജലം ഒഴുക്കിവിടുന്നതു. ആരും ഇതു കണുന്നില്ലെ ആവോ?

മനോഹരമായ ഒരു അസ്തമനം. എന്നാല്‍ സൂര്യന്‍ കടലില്‍ മുങ്ങുന്ന ദൃശ്യം പലപ്പോഴും കിട്ടറില്ല. ഇത്തവണയും അങ്ങനെ തന്നെ.

കട്ടമരം മത്സ്യബന്ധനത്തിനു പോകുന്നവര്‍ ഇതിലാണു പോവുന്നതു. ഏറിയാല്‍ രണ്ടു പേര്‍‌ക്കു മാത്രം പോകവുന്ന ഇത്തരം വള്ളങ്ങള്‍‌ കോവളത്തും, കന്യാകുമാരിയിലും, ശംഖുമുഖത്തും മാത്രമാണു ഞാന്‍‌ കണ്ടിട്ടുള്ളത്‌.

ഇപ്പോള്‍ ഇത്രയും ചിത്രങ്ങള്‍ മാത്രം. കൂടുതല്‍ ചിത്രങ്ങള്‍ പിന്നീടുചേര്‍‌ക്കാം